AD халықаралық басылымы (Architectural Digest) 2025 жылы ашылатын ірі музейлер тізімін жариялады. Тізімге Париждегі Cartier қорынан бастап Наосимадағы жаңа өнер мұражайына дейінгі әлемнің түкпір-түкпіріндегі түрлі мәдени нысандар кірген. Соның ішінде 2025 жылдың жаңалығы бола алатын АҚШ, БАӘ, Жапония, Франция, Нидерландыда орналасқан 11 мұражайдың аты ерекше аталып көрсетіледі. Аталған тізімде Нұрлан Смағұловтың Almaty Museum of Arts жеке заманауи өнер мұражайы да жүр, деп жазады Dalanews.kz.
Forbes.kz басылымының мәліметінше, Нұрлан Смағұловқа тиесілі ғимараттың жобасын 60 елдегі сәулет нысандарының авторы, британдық Chapman Taylor сәулет бюросы жасаған.
"Құдды бәрі алдын ала келісіп алғандай, әлемнің жетекші сәулетшілері тамаша ғимараттардың жобасын жасады: сәулетші 10 жылдан астам уақытын кетірген Әбу-Дабидегі көптен күткен Гуггенхайм Фрэнк Гери мұражайы; Париждегі Жан Нувель сызбасын жасаған Cartier қоры; Роттердамдағы MAD Architects компаниясының футуристік Fenix-і (Лос-Анджелестегі Лукас мұражайы да осы студия жасаған); Әбу-Дабидегі Foster + Partners компаниясының шейх Заидтың ұлттық мұражайы; Тадао Андо жасаған Наосимадағы жаңа өнер мұражайы көзді тұндырады", - деп жазады AD.
Forbes Kazakhstan мәліметінше, Смағұловтың жобасына жасалған инвестициялардың жалпы сомасы 100 млн доллардан асады. Оған мұражай ғимаратының құрылысы, өнер туындыларын сатып алу және мұражай шығындарын жабу үшін эндаумент-қорын құруға жұмсалған шығындар кіреді.
Almaty Museum of Arts топтамасын, негізінен қазақстандық суретшілер қамтиды: Айша Ғалымбаева, Салихитдин Айтбаев, Әбдірашит Сыдыханов, Рустам Халфин, Ербосын Мелдібеков және тағы басқалары. Сондай-ақ мұражайда Ричард Серра, Ансельм Кифер, Билл Виола, Александр Кальдер сынды шетелдік суретшілердің жұмыстары ұсынылады. Бәрінен бұрын, шетелдіктерді мұндағы аты аңызға айналған жапон суретшісі Яйои Кусаманың "Шексіздік бөлмелері" атты иммерсивті инсталляциясы қатты қызықтырып отырған көрінеді.
Бұған дейін сайтымызда Нұрлан Смағұловтың компаниясы KASE-дегі жай акцияларын кері қайтарып алғанын жазғанбыз.
