2025 жылғы Нобельдің бейбітшілік сыйлығы Венесуэла оппозициясының жетекшісі Мария Корина Мачадоға берілді, деп хабарлайды Dalanews.kz.
Демократия мен бейбіт өзгерістер үшін күрес
Норвегия Нобель комитеті Мачадоның Венесуэла халқының демократиялық құқықтарын қорғауға және диктатурадан демократияға бейбіт жолмен өту үшін күреске қосқан үлесін жоғары бағалады.
Азаматтық ерліктің үлгісі
Комитеттің мәлімдеуінше, Мария Корина Мачадо - азаматтық батылдықтың айқын үлгісі. Ол оппозицияны біріктіріп, елде еркін және әділ сайлаулар өткізу үшін күрескен басты тұлға ретінде аталды.
Нобель комитеті саясаткердің қоғамды біріктіруге, милитаризацияға қарсы тұруға және бейбіт өзгерістер идеясына адалдығы Нобель сыйлығының барлық қағидатына толық сәйкес келетінін атап өтті.
Трамп
Трамп өзін тарихта бейбітшілік орнатушы ретінде қалдырғысы келетінін айтады. Сайлау науқаны кезінде ол соғыстарды тоқтатуға уәде берген болатын және Ақ үйге қайта оралған соң сыртқы саясатта ерекше белсенділік танытты.
Ол Украина мен Ресейді татуластыруға тырысты. Ал оның Таяу Шығыстағы 20 тармақтан тұратын бейбіт жоспарның алғашқы бөлігі жуырда Мысырда өткен келіссөздерде мақұлданды. Сарапшылардың пікірінше, бұл жоспар - ХАМАС ұстап отырған израильдік тұтқындарды босатып, Газадағы соғысты тоқтатуға мүмкіндік беретін ең нақты шанс.
Трамптың сыртқы саясаты туралы талқылауларда Нобельдің бейбітшілік сыйлығы тақырыбы жиі қозғалады. Көптеген сарапшылардың айтуынша, осы сыйлыққа ие болу Трамп үшін басты ынталандырулардың бірі. Президенттің айналасындағы адамдар да оның бұл марапатқа лайық екенін айтып, ал Трамптың өзі де оны бірнеше рет ашық түрде атап өткен.
