Облыс әкімі Ж.Түймебаевтың арнайы тапсырмасына сәйкес, Мақтаарал ауданы әкімінің аппараты ақпараттандыру, мемлекеттік құпияларды қорғау және мемлекеттік қызмет көрсету мониторингі бөлімінің, аудандық ішкі саясат, мәдениет және тілдерді дамыту бөлімінің ұйымдастыруымен «Дәстүрлі құндылықтар керуені» тақырыбындағы көшпелі жиын Мақтаарал ауданына келді.
Тұрғындардың мәдени және рухани сезімдерін қалыптастыру, деструктивті діни ағым жақтастарын қазақстандық қоғам құндылықтарына бейімдеу, мемлекет пен дін арақатынасындағы зайырлылық ұстанымы бойынша халықты ақпараттандыру – дәстүрлі құндылықтар керуенінің басты мақсаты.
Ең алдымен жиынға қатысқан қонақтар деструктивті діни ағымдардың зардабын көрген кейіпкерлер туралы видеороликті тамашалады.
Еркін форматта өткен жиынды аудан әкімінің орынбасары Алтын Ешанқұлова жүргізіп отырды. Сондай-ақ, көшпелі іс-шараға облыс әкімі апаратының құқық бөлімінің басшысы Н.Ешенқұлов, бөлімнің бас инспекторы Е.Мұстафа, облыстық дін істері басқармасы «Дін мәселелерін зерттеу орталығы» мекемесі директорының орынбасары М.Беспаев, облыстық мәдениет және тілдерді дамыту басқармасы, Халық шығармашылығы орталығының бөлім басшысы Ш.Мамытхановалар қатысты.
«Дін – аса мұқияттылықты, терең зерттеуді, биік сауаттылықты, әсіресе, жан тазалығын қажет етеді. Сондықтан осы қасиеттерді халыққа жеткізіп, жетілдіріп отыру керек. Сонда ғана жұрттың дінге деген сенімі артып, ұстанымына селкеу түспейтін болады. Осыған орай, облыс әкімінің бастамасымен аймақтарға жол тартқан «Дәстүрлі құндылықтар керуені» жобасы жерлестеріміздің ұлттық құндылыққа деген ұстанымын бекемдеп, дәстүрлі дінге деген көзқарасын қалыптастыруда зор мүмкіндік берді. Тіпті, аталмыш жоба аудан тұрғындарының арасында дәстүрлі рухани мәдениетті ілгерілету, мемлекетіміздің рухани тірегі болған асыл дініміздің жалпыға ортақ адамгершілік қағидаларын насихаттауды өзек етеді» - деді А. Ешанқұлова.
Айта кетейік, көшпелі жиын мақтааралдықтарға рухани құндылықтарды жаңғырту және халықтың ұлттық санасын ояту арқылы теріс пиғылды діни ағымдармен қарсы күресудің мәдениетті жолын түсіндірді. Сондай-ақ, рухани санасын жаңғырту, салт-дәстүр, мәдениетімізді көздің қарашығындай сақтай білу және тағылымы мол тарихымызды қастерлеудің құндылығын әрбір азаматқа ұғындырды
