Мемлекеттік кірістер комитеті қазақстандықтарға пәтер, үй, саяжай, гараж және басқа да жер учаскелері үшін 2024 жылға есептелген мүлік салығын уақытында төлеуді ескертті. Бұл төлем барлық жылжымайтын мүлік иелеріне міндетті, - деп хабарлайды Dalanews.kz.

Қалай хабарланды?

Салық сомасы туралы қағаз түріндегі хабарламалар шілдеде жіберілген. Сонымен бірге, екінші деңгейлі банктердің мобильді қосымшалары арқылы push-хабарламалар да таратылған.

Уақытында төлемеген жағдайда:

• 1 қазаннан кейін әр кешіктірілген күн үшін өсімпұл есептеледі.

• Салық органдары борышкерге қарыз туралы ескерту жібереді.

• 14 қарашадан бастап 1 АЕК-тен (3 692 теңге) жоғары берешек болса, өндіріп алу туралы салық бұйрығы шығарылады.

• Егер бұдан кейінгі 5 жұмыс күні ішінде төлем жасалмаса, құжаттар жеке сот орындаушыларына беріледі.

Жеке сот орындаушыларының өкілеттіктері:

• Борышкердің банк шоттары мен қаржысын бұғаттау;

• Жылжымайтын мүлік пен өзге де мүлікке қатысты мәмілелерді шектеу;

• Егер қарыз 40 АЕК-тен (147 680 теңге) асса, борышкердің елден шығуына тыйым салу.