Үкімет депутаттардың медицина қызметкерлерін қорғауға бағытталған түзетулерін үш рет қабылдаудан бас тартқан адамның кім екенін анықтап жатыр, деп хабарлайды Dalanews.kz.
Неліктен депутаттардың медицина қызметкерлерін қорғауға арналған түзетулерін үш рет қабылдамай тастағаны қазір үкіметте анықталып жатыр. Бұл туралы Премьер-министрдің орынбасары Ермек Көшербаев мәлімдеді.
22 шілде күні Мәжіліс депутаты Асхат Аймағамбетов парламент депутаттары Қылмыстық кодекске медицина қызметкерлеріне күш көрсету үшін жауапкершілікті күшейтуге қатысты түзетулерді үш рет ұсынғанын, алайда үкімет оларды қолдамағанын айтқан болатын.
Көшербаевтың айтуынша, ол Денсаулық сақтау министріне депутаттардан өтініштердің қашан түскенін анықтап беруді сұраған. Алайда әзірге жауап алмаған.
"Кеше (23 шілде – авт.) жарияланған ақпаратты оқыған бойда мен министрге қоңырау шалдым. Бұл өтініштердің қашан болғанын анықтап беруін сұрадым. Ақпаннан бастап, яғни мен жұмысқа кіріскен уақыттан бері ондай өтініштер болған жоқ. Бірақ біз Асхат Аймағамбетовпен бұл мәселені көктемде, осындай бірнеше шабуыл орын алған кезде талқылаған едік. Бұл тақырыпта бізде ешқандай қарама-қайшылық немесе көзқарас айырмашылығы болған жоқ. Біз мұндай адамдарға қатысты ең қатаң шаралар қолдану қажет дегенге толық келістік", – деді ол үкіметтегі брифингте.
Көшербаевтың айтуынша, үкімет "мұның бәрін үнсіз бақылап отырған жоқ". Сәуірден бастап үкімет парламентпен бірлесіп, жазаны күшейтудің әртүрлі нұсқаларын қарастырған.
Қарағанды мен Қостанайда медицина қызметкерлеріне шабуыл жасалғаннан кейін Қасым-Жомарт Тоқаев медицина қызметкерлеріне жасалған шабуылдар үшін жазаны күшейтуді тапсырған. Қазақстан Премьер-министрі Олжас Бектенов медицина қызметкерлерін қорғауға бағытталған заңға түзетулерді әзірлеуге 10 күн уақыт берген.
