Мәжіліс депутаты Бақытжан Базарбек ұлттық банктің саясатының тиімділігіне күмән келтірді. Оның айтуынша, елде не инфляциялық күтулер тым жоғары, не реттеуші органның өзі көрінгендей мықты емес, деп хабарлайды Dalanews.kz.

2024 жылдың желтоқсанында негізгі мөлшерлеме 15,25%-ға, ал 2025 жылдың наурызында 16,5%-ға дейін көтерілді. Соған қарамастан, инфляция жыл басында 8,6% болса, наурызда 10%-ға жеткен.

Ұлттық банк төрағасы Тимур Сүлейменов бұл мәселемен жұмыс белсенді түрде жүріп жатқанын айтты. Оның айтуынша, басты мәселе – ауқымды фискалдық ынталандыруда.

"2024–2025 жылдары біз Ұлттық қордан көп көлемде қаржы алдық. Өткен жылы шамамен 6 трлн теңге, биыл 5,3 трлн теңгені қайтадан қорға қайтардық. Бірақ айналымдағы ақша массасы бәрібір өсіп жатыр. Егер статистикаға қарасақ, биылғы бірінші тоқсанда ақша массасының өсуі шамамен 18%-ды құрады, ал ЖІӨ-нің номиналды өсімі – 13%. Яғни тауарға шаққандағы ақшадағы айырма 4,5–5% болып тұр", – деп түсіндірді Сүлейменов.

Ол ел ішіндегі өндірісті жылдам арттыру үшін тауар массасын көбейту және бизнеске қойылатын бюрократиялық кедергілерді жою қажеттігін атап өтті.

Сонымен қатар, реттеуші басшысы инфляцияны тежеу бойынша кешенді шаралар топтамасы жақын арада таныстырылатынын айтты.

Айта кетейік, Базарбек үкіметтің шешімдерін алғаш рет сынап отырған жоқ. Маусым айының басында ол Денсаулық сақтау министрлігі мен «СК-Фармацияны» әрекетсіздікке байланысты сынға алған еді.