Депутат Анас Баққожаев ағасының анасына құрметсіздік көрсетуіне қатысты не ойлайтынын айтты, деп хабарлайды Dalanews.kz Nege.kz-ке сілтеп. 

Бұған дейін Астанадағы сот мәжіліс депутаты Анас Баққожаевтың ағасы Арыс Баққожаевты отбасы-тұрмыстық қатынастар саласында құқыққа қайшы әрекет жасағаны үшін кінәлі деп танығанын хабарлаған едік. Ол мас күйінде өз анасына балағат сөздер айтып, құрметсіздік танытып, оның тыныштығын бұзған. Сот оған мұндай әрекеттерге жол берілмейтінін ескертіп, бір жыл бойы жәбірленушінің келісімінсіз оған жақындауға, сондай-ақ спирттік ішімдіктер мен психотроптық заттар қолдануға тыйым салды.

Мәжіліс кулуарында журналист депутат Баққожаевтан осы жағдайға қатысты пікірін сұраған. Оның айтуынша, ол бұл оқиға туралы алғаш рет естіп тұр және анасының бұл жағдайды одан жасырған болуы мүмкін деп болжады.

Парламент мүшесі балалардың ата-анасына құрметсіздік танытуына қарсы екенін айтты. Дегенмен, ол бауырына жанашырлық танытып, оның ажырасу мен баласымен араласа алмауынан қатты күйзеліп жүргенін атап өтті.

«Ажырасу кезінде әкелерге де оңай емес. Себебі көбінесе аналар балаларды әкелеріне қарсы қояды. Шынын айтқанда, менің ағам дәл сондай жағдайға тап болды. Ер адамдардың да құқығын қорғау керек деп санаймын», – деді ол.

Журналист отбасылық қиындықтар анаға деген құрметсіздікті ақтай ма деп нақтылады.

«Жоқ. Бұл оған олай жасауға рұқсат бермейді және оның ісін ақтай алмайды. Біз анамызды құрметтеуіміз керек. Ол – менің туған ағам. Әкеміз ерте қайтыс болды, біз төрт жасымызда әкесіз қалдық. Анамыз екі баланы жалғыз өзі тәрбиелеп өсірді және бізді жақсы тәрбиеледі. Мүмкін, ол бұл әрекетке күйзелістен барған шығар. Бірақ мен бұл туралы шынымды айтсам, білмедім. Мүмкін, анамыздың мұны менен жасырғаны дұрыс та болған шығар. Қай ана баласын жаман жағынан көрсеткісі келеді? Бұл – біздің отбасымыздың ішкі мәселесі, біз оны өзіміз шешеміз. Маған осыны хабарлағандарыңыз дұрыс болды», – деп түйіндеді Баққожаев.