Қуандық Бишімбаевқа қатысты сот отырыстарының бірінде марқұм Салтанат Нүкенованың анасы Бишімбаев көлікпен бала қаққаны жөнінде айтқан еді. Ішкі істер министрінің орынбасары Игорь Лепеха бұл ақпарат тексерілгенін айтты, - деп хабарлайды Dalanews.kz.

"(Бишімбаев - еск.) көлікпен бала қағып кетті деген ақпаратқа тоқталайын. Бұл ақпарат расталмады. Марқұмның (Салтанат Нүкенованың - еск.) туыстарымен, оның ішінде ағасымен де сөйлестік. Ақпарат қайдан шыққанын тексердік. Бірақ онда басқа жағдай туралы айтылған. Сондықтан бұл ақпарат расталмады", - деді Игорь Лепеха Мәжілістің жалпы отырысынан соң.

Бұған дейін жәбірленуші тарап өкілі Бишімбаев жауапкершіліктен құтылғанын да айтқан еді. Ал кейін ІІМ бұл ақпаратты тексеретінін мәлімдеді.

Сонымен қатар, экс-министр Қуандық Бишімбаев жүргізуші куәлігінен айырылмайды. Өйткені ол сотта мас күйде көлік тізгініне отырғанын мойындаған еді.

Бишімбаев алкогольге, есірткіге мас екенін дәлелдейтін куәландырудан өтпегені айтылған. Сондай-ақ, ІІМ Әкімшілік құқықбұзушылық туралы кодекстің (ӘҚБтК) 608-бабы бойынша құқықбұзушылықтың құрамдас бөлігі мас күйде көлік тізгіндеу екенін еске салды.

"Медициналық куәландырудың ресми қорытындысы және ӘҚБтК-нің 608-бабында көзделген құқықбұзушылық құрамы болмаған, сондай-ақ, жауапқа тартудың мерзімі өткен кезде (ӘҚБтК-нің 62-бабы) адам осы бап бойынша әкімшілік жауапқа тартылмайды", - деді ІІМ өкілдері Tengrinews.kz-ке ресми жауапта.

4 сәуірде жәбірленуші тараптың адвокаты Жанна Оразбахованың сұрақтарына жауап берген Бишімбаев 9 қарашаға қараған түні "орташадан сәл жоғары" мас болғанын, бұл оның тізгінге отыруына кедергі болмағанын айтты.

"Яғни, сіз мас күйде көлік жүргіздіңіз, мен сізді дұрыс түсіндім бе?" - деп сұрады Оразбахова.

"Иә", - деп жауап берді Бишімбаев.