Әйелін өлтірді деп айыпталған экс-министр Қуандық Бишімбаев 24 жылға сотталды. Бұл іс бүкіл елді дүр сілкіндірді. Қоғамда Бишімбаев ісіне түрлі баға беріліп жатыр. Журналист Гүлжан Ерғалиева әлеуметтік желіде бұл істі "арнайы құрылған жоспар" деп атады, - деп хабарлайды Dalanews.kz.
"Бишімбаев ісі жоғары билікте отырғандардың жақсы жоспарланған жобасы болып шықты. Біріншіден, сот отырысы басталардан бір ай бұрын сотталушының адвокаттарымен "күтпеген" сұхбат жүргізген кезде соны сездім және бұл олардың жоспарын тас талқан ете жаздады.
Бұл үшін олар маған боттар жіберді. Елмедиадағы "Дело Бишимбаева - это Белый шум" атты шығарылымымызда олардың жоспары қандай болғанын, яғни психологиялық айла-шарғы жасау арқылы елдегі су тасқынынан немесе отбасылық банктер елден миллиардтаған долларды алып кетуі секілді маңызды мәселелерден халық назарын бұру болғанын айттым.
Сонымен қатар, біреулерге осы процесті өз қолына алу үшін тұрмыстық зорлық-зомбылық туралы заңды тезірек енгізу керек еді, оған қоса олардың қолында билік пен қоғамға, соның ішінде әйелдерін ұрып-соғатын басқарушы элитаға әсер ету тетіктері болуы керек еді. Мысалдар іле-шала шыға бастады - дипломаттың әйелі мен аудан әкімінің әйелі шағымдарын айтты. Бұл - тек бастамасы. Сонымен қатар, біреу Тоқаевты халық пен әлемге елдегі "сот реформасын" қоғамдық процестің мысалында саяси іс емес, тұрмыстық зорлық-зомбылық ісі бойынша көрсетіп, олардың Жаңа Қазақстанға сенімін қалыптастыру керек деп сендірді", - деп жазды ол.
Журналист ресейліктердің бұл іске "ерекше" назар аударуы тегін дүние емес деп топшылап отыр.
"Олар өз жоспарының салмағын арттыру үшін үшін Ресейді, соның ішінде Ресей Федерациясының арнайы пропагандамен айналысатын қызметтеріне жүгінді. Олар бірнеше миллион бот арқылы басқарылатын ақпараттық ресурстарын тартты. YouTube-тің сот трансляциясының алгоритмі 75 пайыз көрермен Ресейден екенін көрсетті. Олар оған қоса жәбірленушінің туыстары мен адвокаттары қатысқан ресейлік және біздің арналардағы шығарылымдарды "көрді", - деп жазды Ерғалиева.
Гүлжан Ерғалиеваның айтуынша, Бишімбаев және оның отбасы билікпен келісімге келген, алайда олар алданып қалған.
"Бірақ ең қызығы, олар Бишімбаевтарды алдады! Билікке жақын топтарда таратылған ақпаратқа сәйкес, сотталушыға және оның отбасына алқабилер сотына және ашық процеске келісу үшін мәміле жасау ұсынылған. Оның есесіне Бишімбаев 15 жылға дейін бас бостандығынан айыру заңды жазасын алатыны айтылған. Нәтижесінде трансляция жүргізілді, жұртшылық арасында қызу талқыға түсті және қоғамдағы осындай жағымсыз резонанстан қорқып, Бишімбаевқа толық мерзім берді. Алайда саналы түрде ойланатын кез келген заңгер 24 жыл деректер бойынша ғана емес, жалпы тәжірибе бойынша пропорционалды үкім емес екенін мойындайды. Бишімбаев тұрмыстық оқиғаға қатысы бар бірінші кісі өлтіруші емес. Басқаларға осыған ұқсас қылмыстар бойынша 10-12 жыл беріледі", - дейді ол.
Журналист Бишімбаев ісінің қандай нәтижесі болғанына тоқталды.
"Сонымен осы "Ы операциясы" нәтижесінде не таптық? Біріншіден, төменгі палатаның бірқатар депутаттары келіспеген шикі заң. Енді мәселе, билік соққыға жығылған әйелдердің жүздеген шағымдарын қалай шешеді, енді барлық абьюзерді отырғызу керек емес пе ?! Бірақ бұл жерде біреу саяси жағынан да, қаржылық жағынан да жақсы пайда көріп қалды. Екіншіден, осы бағыт бойынша "мақсатты түрде" процесті жүргізген судья Құлбаеваға сенуге бола ма? Қорғаушы тараптың өтініштері мен басқа да сот құқықтарының 90 пайызын қабылдамаған бұл қандай процесс болды? "Құпия бөлмеде" алқабилер еркін пікір білдіре алды ма? Үшіншіден, "Бишімбаевтың ісіне қызығушылық" танытқаны үшін ресейліктерге, соның ішінде бір іс-шарасы 300 мың доллардан кем түспейтін, гонорарсыз аяқ баспайтын Ксения Собчакка кім миллиондаған доллар төлеген? Халықтың ақшасынан төледі ме? Бұл үшін кім жауап береді?
Ақиқаты белгісіз, қараңғы іс бойынша осындай толассыз сұрақ қоя беруге болады. Бірақ ең бастысы, бәрімізді алдап соқты, оның артында тұрған "игі мемлекеттік мүдде" үшін жеке адамға және қоғамға қарсы заңсыздық жасалды. Менің ойымша, Бишімбаевтың Президент Тоқаевтан оның айналасынан біреу ұйымдастырған осы алаяқтық туралы ашық қызметтік тергеуді талап етуге толық құқығы бар. Мұндай жолмен, қоғамның манипуляциясымен халықтың құрметі мен сеніміне ие болу дұрыс емес!" - деп түйіндеді ол.
