Жаңа фильм Ұлттық ұланның құрамына кіретін арнайы жасақтың қиын да қауіпті қызметіне арналған.
Картина еліміздің Мәдениет және ақпарат министрлігі тапсырысы бойынша «Ұлттық киноны қолдау мемлекеттік орталығы» көмегімен түсірілді.
Туынды желісіне арнайы жасақта қызмет ететін үш жауынгердің достығы арқау болған. Олардың күнделікті міндеті – қауіпті қылмыстық топтарға қарсы тұру. Сондай қылмыстық топқа қарсы текетірестің бірінде үш жауынгердің достығы сыналады.
– Жауынгерлер арасында күрең берет деген өздерінің арнайы атағы бар. Қазақстан бойынша осы жылдары әскерде жүрген 200 азамат қана сол күрең беретке ие болған. Солардың өмірі күнделікті қалай шыңдалатындығы, қалай өздерінің қызметін атқаратындығы жайында бүге шігесіне дейін көрсетілді. "Ұлттық киноны қолдау мемлекеттік орталығы" КЕАҚ Басқарма төрағасы Құрманбек Жұмағали.
«Burkit» режиссер Данияр Ибрагимовтың дебюттік фильмі. Ол бұған дейін отандық «Алтыншы пост» және «Қазбат» әскери экшн-фильмдерінің продюсері болған. Фильмнің түсіріліміне арнайы жасақ, әскери техника мен авиация, сондай-ақ екі жүзден астам мерзімді әскери қызметші қатысқан. Жедел-іздестіру шаралары арқау болған картинаның кейбір эпизодтары шынайы оқиғаларға негізделген. Түсірілім Алматы облысының көрікті жерлерінде, Есік таулары мен Іле өзенінде өтті.
– Көркем фильмде Қазақстанның арнайы мақсаттағы қызмет қызметкерлерінің күнделікті орындап отырған жұмысы әскери достығы мен қарым- қатынастары және қазіргі таңдағы еліміздің атқарып отырған қызметшілеріне арналған көркем фильм. Актерлық құрам түсірілім жұмыстарына кіріспес бұрын бірнеше апта бойы жауынгерлік қимылдарды үйренді. Тіпті, басты кейіпкерлерге бір мезетте 3 мың метр биіктіктен тікұшақтан парашютпен секіруге тура келді. Ал бұл кадрды түсіру үшін операторлардың өздері де парашютпен секірді, – дейді ҚР Ұлттық ұланы бас қолбасшысының орынбасары Қайрат Үмбетов.
Ал актер Санжар Мәди болса филь жайындағы ойын былайша жеткізді:
– Фильмде менің атым Феникс. Мен үшін бұл фильм өте қиын түсірілім болды. Сарбаздың киімі өте ауыр – 50 келіге дейін жетеді. Басқа киетін әскери дулығының салмағы 15 келі тартады, – деді актер.
Фильмнің қоюшы операторы Азамат Дулатов, продюсері және әскери кеңесшісі отставкадағы полковник Камал Жақсылықов. Басты рольдерде Дәурен Серғазин, Санжар Мәди, Асылхан Төлепов, Гүлнәз Жоланова, Әсел Сағатова, Жандос Айбасов және Азамат Сатыбалды ойнайды.
Туынды кинокартинаның кейіпкерлері арқылы Отанға деген сүйіспеншілікті, достық пен патриотизмді, әскери антқа және қызметтік міндетке деген адалдықты дәріптейді. Фильмді кинотеатрлардан көруге болады.
