Астанада 13 сәуірден бастап "Таза Қазақстан. Астана – тазалық пен тәртіптің үлгісі" ауқымды экологиялық акциясы басталды.
Осы апта "Киелі мекен" атауымен өтіп, тарихи-мәдени ескерткіштердің аумағын абаттандыру жұмыстарына арналады, деп хабарлайды Dalanews.kz елорда әкімдігінің ресми сайтына сілтеме жасап.
Экологиялық акция шеңберінде Мәдени мұра нысандарының, ескерткіштердің және оларға іргелес аумақтардың қасбеттерін ретке келтіру бойынша тазалау және жұмыстар жүргізілуде. Акцияны белсенді тұрғындар, мәдениет қайраткерлері, спортшылар, қоғамдық және үкіметтік емес ұйымдар, еріктілер, оқушылар мен студенттер, "Жас сарбаз" патриоттық қозғалысының мүшелері, мәслихат депутаттары, Ауған соғысының ардагерлері, мемлекеттік мекемелердің қызметкерлері және басқалар қолдады.
Астанада 50-ге жуық тарихи және мәдени ескерткіш пен 33 тарихи ғимарат бар. Экоакция аясында елордада тарихи-мәдени ескерткіштер мен ғимараттардың аумағын абаттандыру және тазарту бойынша 40-тан астам іс-шара жоспарланған.
"Елімізде қалаларды абаттандыру мен көгалдандыруға бағытталған үлкен экологиялық акция ұйымдастырылды. Бүгінгі акцияға ауған ардагерлері шетте қалмауға шешім қабылдады және белсенді түрде қатысты. Елорда тұрғындары ретінде өз үлесімізді қосып, қаланы ретке келтіргіміз келеді", - деді ардагер Сәкен Нұрышев.
"Путь мастерства" қоғамдық қорының директоры Рахима Мұқышева атап өткендей, қаланы тазарту жөніндегі іс-шаралар тек игі және пайдалы іс қана емес, сонымен қатар өскелең ұрпаққа үлгі болып саналады.
"Бүгін Жерұйық саябағын тазалау ұйымдастырылды. Біз бұл іс-шараны ұзақ күттік, әсіресе біздің Қордың еріктілері, қарт адамдар. Біз олармен бірге тазалауға қатысуға, қаланың тазалығына үлес қосуға келдік. Біз сондай-ақ Алматы ауданының тұрғындарымыз. Біз үшін бұл саябақты таза және ұқыпты ұстау маңызды саналады. Менің ойымша, бұл өскелең ұрпақ үшін үлгі. Осылайша біз еңбек арқылы жақсылық жасап, қуаныш сыйлай алатынымызды көрсетеміз", - деді Рахима Мұқышева.
Елордада акция жалғасуда. Оған мәдениет мекемелерінің ұжымдары, оның ішінде театр және кино әртістері, эстрада өкілдері, медиа саласының тұлғалары қатысады. Олар Жазушылар аллеясын, "Керей мен Жәнібек", Қаныш Сәтбаев, Асқар Забикулин ескерткіштерін және оларға іргелес аумақты ретке келтіреді. Тазалауға мұғалімдер мен оқушылар, мәслихат депутаттары мен белсенділер де қосылады.
Естеріңізге сала кетейік, елімізде "Таза Қазақстан"республикалық экологиялық акциясы басталды. Әр апта белгілі бір тақырыпқа арналған.Екінші апта "Киелі мекен" деп аталады және тарихи-мәдени ескерткіштердің аумағын абаттандыру жұмыстарына арналған.
• 20-27 сәуір аралығында "Жасыл аймақ" апталығы ағаш отырғызуға, екпелерді ақтауға арналады.
• 4 мамырға дейінгі кезең "Өнегелі ұрпақ" деп аталады және ардагерлердің аулалары мен қарттар үйлерінің аумақтарын тазалауға және абаттандыруға арналады.
Соңғы, бесінші аптада "Мөлдір бұлақ" деп аталатын су айдындары – өзендер мен көлдердің айналасы қоқыстан тазартылады.
