Қоғамдық саясат институтының зерттеу нәтижесіне сәйкес, респонденттердің 70%-дан астамы Қазақстанның дұрыс бағытта дамып келе жатқанын атап өтті. Мұндай пікір әсіресе ауыл тұрғындары (80,7%), 24 жасқа дейінгі жастар (78,9%) және әйелдер (72,2%) арасында жиі кездеседі, деп хабарлайды Dalanews.kz.

Халықтың қазіргі саяси және әлеуметтік-экономикалық жағдайға берген бағасы салыстырмалы түрде қалыпты оптимизмді көрсетеді: сәйкесінше 76,5% және 67%.

Бұл нәтижелер елде жүргізіліп жатқан реформаларға оң көзқараспен байланыстырылады. Қоғамдық-саяси салада азаматтарға ауылдық және аудандық деңгейдегі әкімдерді тікелей сайлау мүмкіндігі берілді, сайлау жүйесі ашық бола түсті, Конституциялық сот қайта құрылды, гендерлік теңдікке бағытталған бастамалар әйелдерге саясат пен қоғамдық өмірге белсенді араласуға жаңа мүмкіндіктер ашты.

Әлеуметтік-экономикалық саладағы өзгерістер бюджет саласы қызметкерлерінің табысын едәуір арттыруға, ауқымды қолдау бағдарламаларын іске қосуға, жер ресурстарына әділетті қолжетімділікті қамтамасыз етуге, сондай-ақ зиянды өндіріс орындарында жұмыс істейтіндер үшін зейнет жасын төмендетуге мүмкіндік берді.

Жалпы, сауалнама нәтижелеріне сәйкес, респонденттердің 89%-ы өз көңіл-күйін оң деп сипаттаған. Бұл көрсеткіш әсіресе 18-35 жас аралығындағы жастар, отбасылы және бойдақ респонденттер, сондай-ақ жоғары білімді азаматтар арасында жоғары.