Ақмола облысының Атбасар ауданында бірнеше тұрғын сібір жарасын жұқтырды. Бұл ақпаратты Денсаулық сақтау министрі Ақмарал Әлназарова растады,- деп хабарлайды Dalanews.kz 

Министрдің айтуынша, жағдай ведомствоның қатаң бақылауында. Қазір мамандар тиісті эпидемияға қарсы шараларды жүргізіп жатыр.

– Барлық профилактикалық және эпидемиологиялық іс-шаралар атқарылып жатыр. Науқастардың жағдайы – орташа ауыр. Қажетті ем қабылдап жатыр, – деді Ақмарал Әлназарова Парламенттің бірлескен отырысынан кейін журналистерге берген сұхбатында.

Министрдің мәліметінше, аудан бойынша карантин жарияланбайды.

– Залалданған ет өнімдері толығымен тәркіленді. Бұл бағытта Денсаулық сақтау және Ауыл шаруашылығы министрліктері бірлесіп жұмыс істеуде, – деді ведомство басшысы.

Айта кетейік, сібір жарасы – аса қауіпті жұқпалы аурулардың бірі. Ол көбінесе мал өнімдері арқылы тарайды.