Алматының Алмалы ауданында киім және ет, тамақ өнімдерін сату бойынша 75-тен астам стихиялық сауда нүктесі жойылды,– деп хабарлайды Dalanews.kz
Алматыда «Таза Қазақстан» республикалық бағдарламасы және «Алматы - біздің ортақ үйіміз» қалалық бастамасы аясында әкім Ерболат Досаевтың тапсырмасы бойынша науқан жүзеге асырылуда. Атап айтқанда, Алмалы ауданында Төле би көшесінен Райымбек даңғылына дейін (шығыс-батыс бағыты) Розыбакиев көшесі бойындағы учаскеде және Прокофьевтен Тұрғұт Озалға дейінгі Төле би көшесінде, «Барыс - 4», «Жұлдыз», «Тастақ» базарлары аумағында стихиялық сауданы жою бойынша белсенді жұмыстар жүргізілуде.
Жүргізілген рейдтер нәтижесінде стихиялық сауданың 75-тен астам нүктесі жойылды, сондай-ақ 47 текше метрден астам қоқыс шығарылды.
Бұл учаскелерде киім мен аяқ киім, тұрмыстық бұйымдар, ет өнімдері және басқа да азық-түлік тауарлары, соның ішінде сүт өнімдері сатылды. Саудагерлер рұқсат құжаттарынсыз, антисанитариялық жағдайда және абаттандыру ережелерін өрескел бұза отырып сатылым жасады.
Саудагерлермен Алматы қаласын абаттандыру ережелерін сақтау туралы түсіндірме әңгіме жүргізілді. Оларға Алмалы ауданы базарларының аумағында сауда орындары ұсынылды.
Ағымдағы жылдың басынан бастап полиция қызметкерлері ҚР ӘҚБтК-нің 204-бабы «Белгіленбеген орындардағы сауда» бойынша 253 әкімшілік хаттама және ҚР ӘҚБтК-нің 505-бабы «абаттандыру ережелері» бойынша 785 хаттама енгізді. Бұл бағыттағы жұмыс жалғасуда.
Естеріңізге сала кетейік, стихиялық сауда фактілерін анықтау және жою, сондай-ақ заңсыз орнатылған сауда объектілерін бөлшектеу жөніндегі ауқымды акция 15 сәуірде басталып, 2025 жылдың 1 мамырына дейін жалғасады. Ағымдағы жылдың 15 сәуірінде ғана уәкілетті органдар полиция департаментімен бірлесіп санкцияланбаған сауданың 143 жағдайын (ҚР ӘҚБтК 204-бабы) және абаттандыру қағидаларын бұзудың 96-бабын (ҚР ӘҚБтК 505-бабы) анықтады.
