Алматы әуежайында болған оқиғаға қатысты көлік полициясы департаменті пікір білдірді, деп хабарлайды Dalanews.kz.
Бұған дейін Алматы әуежайында белгісіз ер адам тексеру бөлімінің қызметкеріне пышақпен қауіп төндіріп, оны кепілге алған болатын.
Көлік полициясы департаментінің баспасөз қызметінің хабарлауынша, 7 наурыз күні әуежайда тексеру аймағына өткен ер адам инспекторды шашынан тартып, асүй пышағымен қорқытқан.
“Құқықбұзушы залалсыздандырылып, полиция бөлімшесіне жеткізілді. Аталған дерек бойынша қылмыстық іс қозғалды. Күдікті уақытша ұстау изоляторына қамалды. Тергеу амалдары жүргізілуде”, – делінген ресми хабарламада.
Сондай-ақ күдіктінің жасы 67-де екені белгілі болды.
Айта кетейік, Алматы әуежайында қылмыскерді ұстауға көмектескен ер адам мемлекеттік наградаға ұсынылады.
Бұл туралы Президенттің баспасөз хатшысы Руслан Желдібай желідегі парақшасында осылай деп жазды.
“Президент қылмыскердің суық қаруын тартып алып, ұстауға көмектескен ер адамның батылдығын ерекше атап өтіп, аталған азаматты мемлекеттік наградаға ұсынуды тапсырды” деді баспасөз хатшысы.
Козачков телеграм-арнасының жазуынша, ол полиция қызметкері емес – оқиға орнына кездейсоқ тап болған және [қызметкерді босатып], өзін кепілдікке алуды ұсынған. Видеода оның пышақты үшкір жағынан жылдам тартып алғаны көрінеді.
Еске салайық, бұған дейін Алматыда ер адам әуежай қызметкерін кепілге алғанын жазған едік.
Әуежай өкілдерінің сөзінше, оқиға бүгін, 7 наурызда әуежайдың ұшу алдындағы тексеру аймағында болған.
Сағат 11:45 шамасында өзін жолаушы ретінде таныстырған ер адам ішкі терминалдағы (Т1) рейс алдындағы тексеру аймағына келген. Алматы халықаралық әуежайының авиациялық қауіпсіздік қызметінің скрининг қызметкерлері ер адамнан құжаттарын көрсетуді сұраған, бірақ ер адам скрининг офицерін шашынан ұстап алып, пышақпен қорқыта бастаған.
7 минуттан кейін әуежайдың желілік полиция бөлімінің (LPD) қызметкерлері және Алматы халықаралық әуежайының авиациялық қауіпсіздік қызметкерлері ер адамның пышағын тартып алған.
Қазіргі уақытта ер адам полиция бөлімінде, құқық қорғау қызметкерлері оқиғаның мән-жайын анықтап жатыр.
