Шымкент қаласының бұрынғы судьясы Жанат Мүсірәлі 7,5 жылға бас бостандығынан айырылды. Оған "әділетсіз шешім шығару үшін" пара алды деген айып тағылған. Бұл оқиға бірқатар азаматтың оның шығарған шешімдерін қайта қарауды талап етуіне түрткі болды, деп хабарлайды Dalanews.kz.
Журналист Жұлдыз Төлеу әлеуметтік желідегі жазбасында дәл осы судьяның 77 жастағы анасының үйіне қатысты әділетсіз шешім шығарғанын мәлімдеді. Оның сөзінше, Мүсірәлі анасының заңды мүлкін үшінші бір тұлғалардың пайдасына шешіп берген.
"Мынау суреттегі Шымкент қаласының судьясы Жанат Мүсірәлі алаяқтық бабымен 7,5 жылға сотталыпты. Дәл осы судья еді анамның көз жасын сорғалатып, маңдай термен салынған үйін алаяқтарға шешіп берген. Енді өзі алаяқтық бабымен сотталып отыр. Сотталушының жазасын жеңілдету үшін 110 млн теңге алған дейді. Мұндай ашкөз судьялардың қара халықта қандай ісі болсын!!! Сол себептен бұл шығарған шешімнің бәрін қайта қарау керек деп есептеймін", – деп жазды ол.
Арыз иесінің айтуынша, 2021 жылы Юрий Какулиди есімді азамат анасының сеніміне кіріп, жылжымайтын мүлікті кепілге қою үшін бірнеше күнге рәсімдеу керегін айтқан. Бірақ шын мәнінде, нотариус арқылы үйді басқа біреудің атына аударып жіберген. Бұл іске тағы бірнеше азамат қатысқанымен, құқық қорғау органдары істі үш жыл бойы тергеп, кейін жауып тастаған.
2024 жылы сот алғашқы инстанцияда зейнеткердің пайдасына шешім шығарғанымен, кейін апелляциялық сот оны кері қайтарып, мүлікті жаңа иесінің еншісінде қалдырған. Енді журналист Жұлдыз Төлеу бұл істі Жоғарғы соттың қайта қарауын талап етуде.
Еске салсақ, судья Жанат Мүсірәлі пара алу және алаяқтық қылмысы бойынша кінәлі деп танылып, 7 жыл 6 айға сотталды. Сотталушылардың бірі заңгер болса, екіншісі делдал ретінде әрекет еткен. Олар жәбірленушіні алдап, 110 миллион теңгесін иемденген.
Қоғам белсенділері мен заңгерлер экс-судьяның барлық шешімі қайта қаралуы керек деп есептейді. Қазіргі таңда бұл мәселеге байланысты Жоғарғы сот пен құзырлы органдарға шағым түсірілді.
