Астанада жаңа Салық кодексін түсіндіру семинары өтіп жатыр, деп хабарлайды Dalanews.kz.

Кодекс 2026 жылғы 1 қаңтардан бастап күшіне енеді. Іс-шара барысында вице-премьер, ұлттық экономика министрі Серік Жұманғарин арнайы салық режимі – жеңілдетілген декларация негізінде жұмыс істей алатын және тыйым салынған қызмет түрлерін түсіндірді.

Рұқсат етілетін қызмет түрлер

Вице-премьердің айтуынша, рұқсат етілетін тізімде мына салалар қалады:

• барлық бөлшек сауда (ірі форматтағы сауданы қоспағанда);

• ауыл, орман шаруашылығы, аквакультура;

• креативті индустрия, мәдениет, спорт;

• техникалық қызмет көрсету, көлік және қоймалау, пошта (бизнестің көлеміне қарай сараланады);

• жылжымайтын мүлік пен көлікті жалға беру (бизнестің деңгейіне қарай сараланады);

• тұрмыстық қызметтер;

• денсаулық сақтау мен әлеуметтік қызметтер (жекеменшік кабинеттер және соған ұқсас қызметтер);

• құрылыс жұмыстары (жұмыс түріне қарай екі тізімге де кіреді);

• тұрғын үй қызметтері: кемпингтер, қонақ үйлер;

• қоғамдық тамақтану: мейрамханалар, дәмханалар және жалпы тамақтану орындары;

• шаштараздар, сұлулық салондары;

• базарлар, шағын дүкендер (оларға шектеу қойылмайды);

• мектепке дейінгі білім беру.

"Үлкен компаниялармен жұмыс істегісі келетіндер жалпыға бірдей белгіленген салық режиміне көшуге тиіс болады", – деді Жұманғарин.

Оның айтуынша, қазіргі таңда шамамен 1,33 млн бизнес субъектісі рұқсат етілген қызмет түрлеріне кіреді. Бұл – шамамен 318 ОКЭД. Министр апта соңына дейін толық тізім порталға жарияланып, кәсіпкерлерден ұсыныстар қабылданатынын айтты.

Тыйым салынатын қызмет түрлері

Ал жеңілдетілген декларацияға кірмейтін, яғни тыйым салынған қызмет салаларының қатарында:

• өңдеу өнеркәсібі;

• көтерме сауда;

• 2 мың шаршы метрден асатын ірі форматтағы бөлшек сауда;

• жер қойнауын пайдалану;

• қаржы секторы толықтай;

• ғылыми зерттеулер;

• көлік және қоймалау (саралауға сәйкес);

• телекоммуникация, радио, ақпараттық технологиялар;

• құрылыс (кейбір қызмет түрлері);

• табиғи монополиялар субъектілері;

• жалға беру және лизинг;

• мемлекеттік басқару;

• білім беру: мектептер мен ЖОО;

• бизнеске арналған қызметтер және өзге де қызмет түрлері;

• коммерциялық емес ұйымдар;

• медицина;

• балық шаруашылығы;

• құмар ойындар.

"Бұл шамамен 790 қызмет түрін қамтиды. Бірақ оларда 500 мыңнан сәл астам кәсіпкер ғана бар. Яғни жалпы бизнес субъектілерінің 30-40 пайызы", – деп түйіндеді Жұманғарин.