Qazaqstannyń halyq ártisi, áigili ánshi Nurǵali Núsipjanov júregine jasalǵan kúrdeli otadan keiin áleýmettik jelidegi paraqshasynda alǵash ret jazba jariialady. Óner iesi basynan ótken jaǵdaidy ómirdiń úlken synaǵy retinde qabyldaǵanyn aitty, dep habarlaidy dalanews.kz.
Ánshi jazbasynda qiyndyqqa moiymai, taǵdyrdyń salmaǵyn sabyrmen kóterýdiń mańyzdy ekenin jetkizdi.
"Otadan keiingi oi-tolǵam… Bul ómir – synaq… Bireýler sol synaqty jylap kóterse, ekinshiler shydap kóteredi… Taǵdyr jolym taqtaidai tegis emes ekenin jalpaq jurtqa jariia etpesem de, kóp jaitty eldiń ishi sezedi… Kókiregine kúiik tolǵan – keide janǵan, keide tońǵan adammyn", – dep jazdy Nurǵali Núsipjanov.
Halyq ártisi ózine ota jasaǵan Almatydaǵy Kardioortalyq dárigerlerine alǵys aitty. Ol meditsina mamandarynyń kásibiligin joǵary baǵalap, ózine ekinshi ómir syilaǵanyn atap ótti.
"Otanyń ońaiy joq. Júregime operatsiia jasap, "kieli sahnańyzǵa baryp, saǵynysh maýqyńyzdy basyńyz, aǵa" dep maǵan ekinshi ómir syilaǵan meditsinanyń saiypqyrandary Ermaǵanbet Qýatbaev, Artýr Abdimomynov pen Azamat Naýrýshevke aq basymdy iip turyp alǵysymdy aitamyn. Almatymen birge jasap kele jatqan Kardioortalyq jańǵyra bersin, jandana bersin", – dedi ánshi.
Jazba sońynda Nurǵali Núsipjanov densaýlyǵyna alańdap, duǵa-tilegin arnaǵan barsha halyqqa rizashylyǵyn bildirdi. Jeli qoldanýshylary men ónerdegi áriptesteri, onyń ishinde Meirambek Besbaev ta ánshiniń tezirek saýyǵyp, sahnaǵa qaita oralýyna tilektestik bildirip jatyr.
