71 milliard teńge investitsiia Ázirbaijan bankine 2014 jyly salynǵan. Bul kezde Ulttyq bankti Qairat Kelimbetov basqarǵany belgili. Sondyqtan zeinetaqy qorynyń qyrýar qarjysyn investitsiialaý sol kezdegi basshylardyń sheshimimen jasalǵanyn Daniiar Aqyshev alǵa tartty.
Ázirbaijan bankiniń qarjylyq ahýaly 2015 jyldyń basynda tómendei bastaǵan. Biraq osyny bile tura sol kezdegi basshylar aqshany qaitarýǵa eshqandai qareket qylmapty. Sondyqtan burynǵy basshynyń qandai qatelik jibergenin endi quzyrly oryndar anyqtaidy deidi bas bankir.
– Ázirbaijan bankinen obligatsiialar satyp alynǵany týraly Elbasyǵa aityldy. Zeinetaqy qorynyń qarjysyna atalǵan bankten qundy qaǵazdar satyp alýǵa qatysty biraz másele bar. Sondyqtan Ulttyq bank ishki tekseris júrgizgennen keiin zeinetaqy qorynyń qarjysyn investitsiialaý týraly qujattardy quzyrly organdarǵa ótkizedi, – QR Ulttyq bankiniń tóraǵasy Daniiar Aqyshev.
Al osy Ulttyq banktiń burynǵy basshylarynyń jazaǵa tartylý-tartylmaýy ázirge belgisiz. Bir anyǵy bankrot bolǵan Ázirbaijan bankindegi mol qarjy búgin-erteń qaitarylmaidy. Óitkeni bankrot bolǵan qarjy uiymy qaryzdy óteýdiń uzaq merzimdi úsh jolyn usynyp otyr. Qai-qaisysyn tańdasaq ta, salymshylardyń tirnektep jiǵan aqshasy kók tiyn paidasyz kemi 7 jyldan keiin elge qaitarylýy múmkin.
– Ulttyq bank salymshylardyń aqshasyn qaitaryp alý maqsatynda Ázirbaijan bankimen kelissózder júrgizip jatyr. Alaida olardyń bizge usynyp otyrǵan ush nusqasy da tiimsiz. Óitkeni investitsiialanǵan qarjynyń ústinen túsetin paida joǵalady. Soǵan qaramastan biz Úkimetpen birlese otyryp ózimizge eń tiimdi joldy tańdap alamyz, – Daniiar Aqyshev.
Bas bankir búgin elimizdiń bank júiesindegi ózgeristerdi de aitty. Aldaǵy ýaqytta «Halyq banki» men «Qazkommertsbank» birigetini týraly burynnan aitylyp kelgen-di. Sondai-aq, «Tsesna bank» «Tsentr kredit bankin» satyp alýdy kózdep otyr eken. «Tengri banki» men «Kapital» banki de birigý týraly Ulttyq bankke usynys jasaǵan. Budan bólek «RBK» men «Qazaq banki» qarjylaryn bir jerde ustaýǵa ýaǵdalasypty. Al litsenziiasynan aiyrylǵan «Qazinvestbanktiń» aktivterin endi «Alfa banktiń» basqaratyny málim boldy. Ekinshi márte eskertý alǵan «Delta banktiń» endi olqylyqtardy túzeýge 15-shi maýsymǵa deiin ýaqyty bar. Eger mindettemelerin oryndai almasa «Qazinvesttiń» kúiin keship, jabylýy múmkin.
Dias Nuraqyn
