Nurlan Qylyshbaev Memleket basshysy zeınetaqy esep-shotynan artyq jınaǵyn alýyna múmkindik beriletin azamattar sanatyn birtindep ulǵaıtýdy tapsyrǵanyn eske saldy. Senator qazirgi tańda shektik somalardy qaıta esepteý taqyryby qoǵamda talqylanyp jatqanyn aıta kelip, ol óz jınaqtaryn paıdalana alatyn adamdar sanyn azaıtatynyn atap ótti.
– Endi óz jınaqtarynyń bir bóligin paıdalana alatyn BJZQ salymshylarynyń sany kúrt qysqarýy múmkin. Eger 2021 jyly olardyń sany 700 myńnan astam Qazaqstan azamaty bolsa, 2022 jylǵy shekti qaıta esepteýge baılanysty bul san túbegeıli ózgeredi. Búginde bul jetkilikti shektegi jasy kelgen qatysýshylar úshin 63%-dan eń jas qatysýshylar úshin 82%-ǵa deıin ósip otyr. Qalyptasqan jaǵdaı osy baǵdarlamaǵa degen senimge nuqsan keltiredi, – dedi depýtat Qylyshbaev.
Senator osyǵan baılanysty jyldyq ınflásıa deńgeıinen aspaıtyn shekti ulǵaıtý múmkindigin qarastyra otyryp, Úkimet basshysynan eń tómengi jetkiliktilik shegin esepteý ádistemesine ózgerister engizý máselesin qarastyrýdy surady.
