Lázzat Ibragimova zeinetaqy jinaǵyn alýǵa múmkindik beretin onlain-portal 8 qańtarda iske qosylatynyn aitty.
"Qaǵaz-qujat resmi rásimdelip, búgin barlyǵyna tolyq qol qoiyp úlgersek 8 qańtarda portaldy iske qosamyz", – dedi ol Feisbýktegi tikelei efir barysynda.
Onyń aityp ótkenindei salymshylarǵa zeinetaqysyn alý úshin arnaiy shot ashý kerek. Shotty portalda onlain ashýǵa bolady. Bank basshysy halyqqa BJZQ-daǵy jinaǵyn sheship almas buryn, asyqpai oilanýǵa keńes berdi.
"Jumysqa kelgende shekteý joq. Ótinish berý 8 qańtarmen toqtap qalmaidy. Aryzdy asyqpai-aptyqpai berýińizge de bolady. Úlgeresiz. Bul is jyl aiaǵyna deiin jalǵasady. Ipotekasyn tezdetip japqysy keletin azamattardy túsinýge bolady. Áitkenmen úi máselesi oiynshyq emes. Barlyǵyn baiyptap baryp sheshim qabyldaǵanyńyz jón.
Men bilsem, bul baǵdarlama budan bylai turaqty túrde jalǵasady. Sondyqtan asyǵýdyń qajeti joq", – dedi ol.
"Otbasy bank" zeinetaqy jinaǵynyń belgili bóligin merziminen buryn sheship alý jumysyna jaýapty operator. Budan buryn bank qańtardyń basynda arnaiy saitty iske qosatynyn habarlaǵan. Aryz berý úshin azamattardyń elektrondy-sandyq qoltańbasy bolýy qajet ekenin aitqan.
Sonymen qatar "Otbasy bankine" - birjolǵy zeinetaqy tólemderin aýdarý úshin jeke tulǵalardyń aǵymdaǵy bank shottaryn ashýǵa jáne júrgizýge ruqsat berildi.
Zeinetaqy tólemderin Qazaqstan Respýblikasynyń zańnamasynda belgilengen maqsattarǵa ǵana (turǵyn úi jaǵdaiyn jaqsartý, emdelýge aqy tóleý), olardy arnaiy aǵymdaǵy shottan nysanaly maqsatyna aýdarý jolymen paidalanýǵa bolady.
Birjolǵy zeinetaqy tólemderine arnalǵan arnaiy shot - turǵyn úi jaǵdaiyn jaqsartý jáne (nemese) emdelý maqsattaryna biryńǵai jinaqtaýshy zeinetaqy qorynan birjolǵy zeinetaqy tólemderin aýdarý úshin alýshymen ashylatyn aǵymdaǵy bank shoty.
«Bul zeinetaqy qorynyń salymshysyna qarajat arnaiy aǵymdaǵy shotqa aýdarǵannan keiin zeinetaqy jinaǵynyń qaýipsizdigine senimdi bolýǵa múmkindik beretin biregei zańnamalyq bastama.
Qarajat barynsha qorǵalatyn bolady, olardy salymshynyń ózge qaryzdyq mindettemeleri sheńberinde eshbir nesie berýshi esepten shyǵara almaidy.
Atalmysh qarajatty salyq bereshegi boiynsha óndirip alý múmkin emes, tipti bul aqsha múlikti tárkileý týraly sot úkimderinen de qorǵalǵan. Osylaisha, eshbir úshinshi tulǵa olardy talap ete almaidy», - dedi Lázzat Ibragimova, «Otbasy Bank» AQ Basqarma tóraiymy.
Birjolǵy zeinetaqy tólemderi aýdarylatyn arnaiy aǵymdaǵy shotty «JSSB24» mobildi qosymshasy arqyly jáne «Otbasy bank» AQ saityndaǵy beineqońyraý qyzmeti arqyly ashýǵa bolady. Sáikesinshe, ótinish berýshilerge Bank bólimshelerine barýdyń qajeti joq. Mundai shotty ashýǵa bailanysty operatsiialardyń barlyǵyn onlain júzege asyrýǵa bolady.
Arnaiy shot ashpai turyp, qoljetimdi somany qandai maqsatta paidalanǵyńyz keletinin anyqtap alǵan jón. Ony «Otbasy Bank» AQ qurastyrǵan onlain platformada jasaýǵa bolady. Ótinimderdi onlain platformada Erejeler bekitilgennen keiin berýge bolady.
Aita ketelik, prezident Toqaev 2021 jyldyń 2 qańtar kúni qazaqstandyqtarǵa zeinetaqy jinaqtarynyń bir bóligin merziminen buryn paidalanýǵa múmkindik beretin zańǵa qol qoidy.
Dalanews.kz zeinetaqyny merziminen buryn alýda “jetkiliktilik shegi” tómendegenin habarlaǵan.
Maqala "Otbasy bankiniń" baspasóz qyzmeti usynǵan málimet negizinde ázirlendi
https://dalanews.kz/talqylanuda/59288-zeynetaqyny-merziminen-buryn-alu-zhet
