Májilis depýtaty Ashat Aimaǵambetov zeinetaqy júiesine qatysty bolatyn ózgerister jóninde pikir bildirip, bul jańalyqty «úmit syilaityn bastama» dep atady, dep habarlaidy Dalanews.kz.
Depýtattyń aitýynsha, qazirgi talqylaý jumys berýshilerdiń mindetti jarnalaryn qaita bólý máselesine qatysty. Qazir jumys berýshi ár qyzmetker úshin ai saiyn qosymsha jarna tóleidi, alaida bul qarajatty bólý tetigi áli naqty bekitilmegen.
Aimaǵambetov bul máselede sarapshylarmen birge óz usynystaryn birneshe ret aitqanyn jetkizdi. Onyń sózinshe, 5 paiyzdyq jumys berýshi aýdarymynyń 4 paiyzy azamattardyń jeke shottaryna tikelei túsip, olardyń jinaǵyn arttyrýy tiis, al 1 paiyzy ortaq qorǵa baǵyttalýy qajet.
«Jumys berýshi ár qyzmetker úshin tóleitin qarajat jeke adamǵa “bailanyp”, joǵalmai saqtalýy kerek. Iaǵni ol qarajat iesizdenbeýi tiis», - dedi depýtat.
Ol mundai tásildi naqty qadam ári ádiletti sheshim dep baǵalady. Depýtattyń aitýynsha, bul másele buǵan deiin de birneshe ret kóterilgen.
Aimaǵambetovtyń sózinshe, basty maqsat - qarajatty shashyratpai, ony barynsha naqty ári ádil baǵyttaý.
«Adam óz aqshasyn kórip, onyń bolashaǵyna qalai jumys istep jatqanyn túsinýi kerek», - dedi ol.
Sonymen qatar depýtat júiede tepe-teńdik saqtalýy mańyzdy ekenin atap ótti. Onyń aitýynsha, qarajattyń bir bóligi - jeke jinaq pen jaýapkershilikke, al ekinshi bóligi - yntymaq qaǵidatyna negizdelip, jinaǵy jetkiliksiz azamattardy qoldaýǵa baǵyttalýy tiis.
Aimaǵambetov mundai model zeinetaqy júiesiniń turaqtylyǵyn qamtamasyz etip, azamattar úshin ádil bolatynyn aitty. Qazir bul másele boiynsha naqty sheshim qabyldanbaǵan, talqylaý jalǵasyp jatyr. Depýtat usynylǵan nusqa jumysshylardyń múddesi úshin qabyldanady degen úmit bildirdi.
