Jetisý oblysynda joǵalyp ketken 7 jastaǵy erekshe balanyń denesi ózennen tabyldy, dep habarlaidy dalanews.kz.
Politsiianyń málimetinshe, 25 mamyr kúni saǵat 19:50 shamasynda balanyń joǵalǵany týraly habar túsken. Aldyn ala aqparat boiynsha, ol úiden keshki saǵat 19:30 kezinde shyǵyp ketken.
Balany izdeýge politsiia qyzmetkerleri, kinologtar, qutqarýshylar men eriktiler jumyldyryldy. Izdestirý jumystary túni boiy toqtaýsyz júrgizilgen.
26 mamyr kúni tańǵy saǵat 05:30 shamasynda balanyń denesi Qaratal ózeninen tabyldy.
Quqyq qorǵaý organdarynyń aldyn ala deregine sáikes, máiitten zorlyq-zombylyq belgileri anyqtalmaǵan.
Qazir oqiǵanyń barlyq mán-jaiyn anyqtaý boiynsha tergeý amaldary júrgizilip jatyr.
