Aqmola oblysynyń Zerendi aýdanynda veterinariialyq qaýipsizdik salasynda óreskel zań buzýshylyqtar anyqtaldy, dep habarlaidy dalanews.kz.
Zerendi aýdany prokýratýrasynyń málimetinshe, tekserý barysynda mal basyn esepke alý jumystarynyń tiisti deńgeide júrgizilmegeni belgili bolǵan.
Prokýratýra qyzmetkerleri politsiianyń ýchaskelik inspektorlarymen birlesip júrgizgen reidter kezinde jalpy sany 7 myńnan asatyn 57 tirkelmegen jylqy tabynyn anyqtaǵan.
«Mal basynyń esebin júrgizýde naqty derekterdiń joqtyǵy anyqtaldy. Politsiianyń ýchaskelik inspektorlarymen birlesken is-sharalar barysynda jalpy sany 7 myńnan asatyn 57 tirkelmegen jylqy tabyny anyqtaldy», - dep habarlady prokýratýra.
Tekserý barysynda epizootiiaǵa qarsy is-sharalardy ótkizý kezinde de zań buzýshylyqtar belgili bolǵan. Veterinariialyq dárigerler vaktsinatsiia aktilerine jalǵan málimetter engizip, keibir jaǵdailarda múlde joq janýarlardy kórsetken nemese bir maldy birneshe ret esepke alǵan.
Nátijesinde aýdanda 2,8 myńnan astam jalǵan vaktsinatsiia faktisi anyqtalǵan.
«Jalpy sany 2,8 myń jalǵan vaktsinatsiia faktisi anyqtaldy, memlekettik biýdjetke 996,2 myń teńge somasyna shyǵyndar óteldi», - delingen habarlamada.
Sonymen qatar aýdan aýmaǵyndaǵy 14 mal qorymynyń veterinariialyq talaptarǵa sáikes kelmeitini anyqtalǵan. Atap aitqanda, qorymdardyń qorshaýlary joq, jer ýchaskeleri zańdastyrylmaǵan jáne balansqa qoiylmaǵan.
Prokýrorlar veterinariialyq stantsiia qyzmetinde de qarjylyq zań buzýshylyqtardy tapqan. Tekserý barysynda qyzmetkerlerge 6 mln teńgeden astam syiaqy men ústemaqynyń negizsiz tólengeni belgili bolǵan.
«Qazirgi ýaqytta onyń 4 mln teńgeden astamy biýdjetke qaitaryldy», - dep málim etti qadaǵalaý organy.
