Qazaqstanda turǵyn úi jaǵdaiyn jaqsartý úshin zeinetaqy jinaǵyn merziminen buryn paidalanýǵa berilgen ótinishter sany kúrt ósti. 2025 jyldyń mamyr aiynda oryndalǵan ótinishter sany 119,1 myńǵa jetip, sáýirmen salystyrǵanda eki esege artqan, dep habarlaidy dalanews.kz.
Bir aida 117,8 mlrd teńge paidalanylǵan
Mamyr aiynda turǵyn úi maqsattaryna jumsalǵan zeinetaqy qarajatynyń kólemi 117,8 mlrd teńgeni qurady. Bul absoliýtti rekord bolmasa da, sońǵy kezeńdegi eń joǵary kórsetkishterdiń biri sanalady. Sarapshylardyń pikirinshe, belsendiliktiń artýyna jetkiliktilik shekteriniń jaqyn arada ósetini týraly aqparat áser etken.
Jańa shekter aitarlyqtai ósti
Maýsym aiynyń basynda jetkiliktilik shekteriniń jańartylǵan mólsheri jariialandy. Jańa ádisteme boiynsha eseptelgen kórsetkishter salymshynyń jasyna qarai 79 paiyz jáne odan da joǵary deńgeide ulǵaiǵan. Bilik ókilderi bul ózgeristi qazaqstandyqtardyń bolashaqtaǵy zeinetaqysyn saqtaý qajettiligimen túsindirgen bolatyn.
Qarajattyń basym bóligi baspana jinaǵyna baǵyttalǵan
Mamyr aiynda zeinetaqy jinaǵyn paidalanýdyń negizgi baǵyty turǵyn úi qurylys jinaqtaryn tolyqtyrý boldy. Barlyq ótinishterdiń shamamen jartysy osy maqsatqa baǵyttalǵan. Sonymen qatar ótinishterdiń 21 paiyzy "Otbasy bank" júiesindegi ipotekalyq nesieni ishinara óteýge jumsalǵan. Aita keteiik, mamyr aiynyń sońynda "Otbasy bank" qazaqstandyqtarǵa jetkiliktilik shekteriniń ósetinin eskertip, qoljetimdi jinaqtardy turǵyn úi máselesin sheshýge paidalanýǵa shaqyrǵan edi.
Mamyr sońǵy belsendi kezeń bolýy múmkin
Sarapshylar jańa shekteýler engizilgennen keiin zeinetaqy jinaǵyn merziminen buryn alý kólemi aitarlyqtai qysqarýy múmkin dep esepteidi. Osyǵan bailanysty mamyr aiy joǵary belsendilik baiqalǵan sońǵy ailardyń biri bolýy yqtimal.
Bes jarym jylda 5,8 trln teńgeden astam qarajat alynǵan
Jalpy alǵanda, sońǵy bes jarym jyl ishinde qazaqstandyqtar turǵyn úi jaǵdaiyn jaqsartý men emdelý maqsattaryna Biryńǵai jinaqtaýshy zeinetaqy qoryndaǵy jinaqtarynyń 5,8 trln teńgeden astamyn paidalanǵan. Eń joǵary kórsetkish 2021 jyly tirkelip, sol kezde azamattar shamamen 2,6 trln teńge alǵan. Sonymen birge 2024 jyldyń ekinshi jartysynan bastap qaitadan belsendilik kúsheigen. Sarapshylar bul úrdisti zeinetaqy jinaǵyn alý tártibine qatysty jańa shekteýlerdiń qoǵamdyq talqylana bastaýymen bailanystyrady.
