Qazaqstannyń birqatar óńirinde qant qymbattap ketti. Ministrlik bul másele ónim tapshy bolǵanynan emes, maýsymdyq suranys artýynan dep otyr. Bul týraly Úkimette ótken brifingte aýyl sharýashylyǵy vitse-ministri Azat Sultanov málimdedi, dep habarlaidy dalanews.kz.
Jaz kelgende qant baǵasy nege sharyqtap ketedi?
Sheneýniktiń aitýynsha, jaz mezgilinde halyq tosap, kompot jáne basqa da qysqy azyq-túlik qoryn daiyndaityndyqtan, qantqa suranys artady. Sonyń áserinen keibir óńirlerde baǵa da ósip otyr.
Vitse-ministrdiń sózinshe, ázirge qant aitarlyqtai qymbattamaidy. Biyl qant qyzylshasynyń mol ónimi boljanyp otyr. Qazir elde otandyq shikizatty óńdeitin úsh qant zaýyty jumys istep tur. Sonymen qatar, Taraz qant zaýytynda da qant qyzylshasyn óńdeý iske qosylady dep josparlanǵan.
Sondai-aq, vitse-ministr óńirlerde baǵa ózgerýine kóterme jetkizýshilerdiń jumysy, import kólemi, sýsyn men konditerlik ónim óndirýshiler tarapynan suranys artýy da áser etýi múmkin ekenin jetkizdi.
"Reseiden, Latyn Amerikasy elderinen jetkizip otyrmyz": eldegi qant qory qansha ýaqytqa jetedi?
Azat Sultanov Qazaqstanda qanttyń bir bóligi Latyn Amerikasy elderinen ákelinetin qant shikizatynan óndiriletinin, al daiyn qanttyń edáýir kólemi áli de Reseiden importtalatynyn aitty.
Onyń málimetinshe, ákimdikterdiń qoimalaryndaǵy qant qory jetkilikti. Baǵa qubylǵan jaǵdaida bul qor satylymǵa shyǵarylyp, baǵa ósýin tejeýge múmkindik beredi.
Qazir elde shamamen úsh aiǵa jetetin qant qory bar.
Keiingi jyldary, biyl baǵa qalai qubyldy: statistika ne deidi?
Aita keteiik, keiingi 3-4 jyl qatarynan Qazaqstanda qant tapshylyǵy, qymbatshylyq baiqalyp otyr. 2022 jyly jazda Qazaqstanda qant tapshylyǵy týyndap, baǵa kúrt kóterilgen edi. Keiin Úkimet importqa táýeldilikti azaityp, otandyq qant qyzylshasyn óńdeý kólemin ulǵaitý baǵytynda birqatar shara qabyldady.
- 2022 jyldyń qorytyndysy boiynsha Qazaqstanda qanttyń bólshek saýdadaǵy baǵasy 2021 jylǵy jeltoqsanmen salystyrǵanda 64,9 paiyzǵa ósken. Bul jyly baǵanyń eń joǵary ósimi jazda tirkelgen. Keibir ailarda qant quny ótken jylmen salystyrǵanda 87 paiyzǵa deiin qymbattaǵan.
- 2023 jyly Qazaqstanda qant baǵasy jyl boiy túrli baǵytta ózgerdi. Jyl basynda tazartylǵan qanttyń jyldyq ósimi 32,2 paiyzǵa, al qumshekerdiń ósimi 55 paiyzǵa jetti. Alaida jyl sońyna qarai baǵa turaqtaldy.
- 2024 jyly qant baǵasynyń jyldyq ósimi shamamen 5,5 paiyz boldy.
Data Hub arnasy málimetinshe, biyl 24 maýsym men 1 shilde aralyǵynda Qazaqstanda qanttyń ortasha baǵasy 1,6 paiyzǵa ósken. Bul - 2022 jylǵy maýsymnan bergi eń joǵary aptalyq ósim.
Jyl basynan beri qant baǵasy birneshe ret kóterilgenimen, buǵan deiin aptalyq ósim kóbine 0,2 paiyzdan aspaǵan.
Óńirlerdegi ahýal qalai?
Óńirler arasynda qant baǵasy boiynsha joǵary ósim Pavlodarda tirkelip, bir aptada 12,5 paiyzǵa qymbattaǵan. Odan keiin Semeide 5,5 paiyz, Kókshetaýda 4,8 paiyz, Atyraýda 3,1 paiyz, Túrkistanda 2,9 paiyz, Petropavlda 2,2 paiyz jáne Oralda 1,7 paiyz ósim tirkelgen.
Qaraǵandyda qant baǵasy eldegi ortasha kórsetkishpen birdei: 1,6 paiyzǵa ósti. Astanada ósim 1,3 paiyz boldy. Al Almaty segiz óńirdiń qatarynda qalyp, munda bir apta ishinde qant baǵasy ózgermegen.
