Aqsý qant zaýytynyń óndiristik qýaty 12 myń tonnany quraidy. Ótken jyly qazan aiynda iske qosylǵan zaýytta osy maýsymda 67 797 tonna qant qyzylshasy óńdelip, 4 myń tonna qant alynǵan.
Aqsý qant zaýytynyń direktory Murat Tólegenovtiń aitýynsha, biyl jańǵyrtýdyń birinshi kezeńinen keiin 140 myń tonna tátti túbir óńdeýge múmkindik týmaq. Zaýytta jomdy syǵyp, qaptaityn tehnologiialyq jeliniń ornatylyp, iske qosylatyny osy jyldyń basty jańalyǵy bolmaq.
– Biz jomdy syǵyp, qaptaityn italiiandyq qural-jabdyq satyp alyp jatyrmyz. Eger buryn jom 4 aidan artyq saqtalmaityn bolsa, atalmysh tehnologiialyq jelini satyp alǵannan keiin bul paidaly mal azyǵy bir jylǵa deiin saqtalynady. Qazir Aqsý, Sarqan, Alakól aýdandarynda bizdiń daiyn ónimderimizdi satyp alýǵa niet bildirip otyrǵan sút taýarly fermalar, sharýa qojalyqtary bar. Taýar ótkizý naryǵyn odan ári keńeitý de oiymyzda. Sonymen qatar zaýytta biylǵy jyly salmaǵy 25 pen 50 kelilik qanttardy qaptaityn 3 zamanaýi jeli iske qosylady. Sondai-aq qural-jabdyqtardy jańǵyrtý men jańasyn ornatý jumystary da júrip jatyr. Atap aitqanda 5 tsentrifýga, vakýýmdyq apparat, filtrler, shyryndar jiyntyǵy. Olarǵa basqarýdyń avtomatty júiesin engizemiz, bul zaýyttyń barlyq jumystary týraly aqparattardy kompiýter ekranyna joldap otyrýǵa, adami faktordy boldyrmaýǵa múmkindik jasaidy, – dedi M. Tólegenov.
Kelesi jyly atqarylatyn ekinshi kezeńde jylý elektr ortalyǵy jańǵyrtylyp, oǵan 4 jańa qazandyq pen týrbina ornatylmaq. Sol siiaqty bý generatorlary da aýystyrylady. Jalpy zaýytqa reseilik, ýkraindyq, shvedtik, italiiandyq, germaniialyq qural-jabdyqtar da qoiylmaq.
M. Tólegenovtiń aitýynsha, qazir zaýytta 190 adam eńbek etedi, kóktemgi-jazǵy maýsymda 250-280 adam, al maýsymyna 600 adam jumys isteidi.
Oblystyń qant qyzylshasyn ósirýdi budan ári damytý josparlaryn aita kele oblys ákiminiń orynbasary Serikjan Beskempirov óńirdiń kóktemgi egiske daiyn ekenin atap ótti.
– Qant qyzylshasynyń frantsýzdyq jáne nemis tuqymy satyp alynyp, olar qazir saraptamadan ótkizilýde. 1 sáýirden bastap bul tuqymdar sharýalarǵa berile bastaidy. Sol siiaqty biylǵy jyly soliarka jeńildikpen beriledi. Oǵan oblys boiynsha 6 operator belgilenip, jumys isteidi. Barlyq aýyl sharýashylyǵy tehnikalary daiyn. Biylǵy jyly óńirde qant qyzylshasynyń alqabyn 12 myń gektarǵa jetkizýdi josparlap otyrmyz. Aqsý qant zaýytynyń budan keiingi jumysyna keletin bolsaq, biylǵy jyly qyrkúiekte qant qyzylshasyn qabyldaýdy bastap, jańǵyrtý jumystary aiaqtalatyn qazan aiynan óńdeý isine kirisedi, – dedi S. Beskempirov.
Atap ótsek, ótken jyly Almaty oblysynda qant qyzylshasynyń alqaby 9,2 myń ga, al qant qyzylshasynyńjalpy ónim jiyntyǵy 334 myń tonna boldy, Kóksý jáne Aqsý qant zaýyttary 31 myń tonna qant shyǵardy.
Almaty oblysy ákiminiń baspasóz qyzmeti
https://dalanews.kz/34222
