Anthropic kompaniiasynyń bas direktory ári negizin qalaýshylardyń biri Dario Amodei jasandy intellekt múmkindikteriniń jyldam artýyna bailanysty qaýipsizdik sharalaryn kúsheitýge shaqyrdy. Onyń pikirinshe, adamzat jańa tehnologiialardy baqylaýǵa daiyn bolǵansha JI júielerin damytý qarqynyn báseńdetý qajet, dep habarlaidy dalanews.kz.
Claude jasandy intellekt júiesin ázirlegen kompaniia basshysy óziniń jańa essesinde JI-diń meditsina, ǵylym jáne ekonomika salalaryna orasan paida ákeletinin atap ótti. Sonymen qatar tehnologiianyń baqylaýsyz damýy kúrdeli qaýipterge ulasýy múmkin ekenin eskertti.
"Jasandy intellektiniń adamzatqa berer múmkindigi óte zor. Alaida modelderdiń damý qarqyny qaýipsizdik sharalarynan ozyp ketpeýge tiis", – dedi Dario Amodei.
Onyń aitýynsha, 2026 jyldyń jazynan beri JI modelderi keiingi býyndaǵy júielerdi jasaýǵa belsendi túrde tartyla bastaǵan. Sonyń saldarynan jasandy intellekt ózinen de qýatty modelderdi ázirleýge qatysatyn rekýrsivti ózin-ózi jetildirý úderisi qalyptasýy múmkin.
Amodei mundai jaǵdaida tehnologiianyń damý jyldamdyǵy adamdardyń jańa júielerdi túsiný jáne baqylaý múmkindiginen asyp ketedi dep qaýiptenedi.
"Jasandy intellektini jasandy intellektiniń ózi jetildire bastaǵan kezde úderis óte jyldam júrýi múmkin. Onyń qarqyny adamdardyń jańa júielerdi túsinip, baqylaýǵa alý múmkindiginen asyp ketý qaýpi bar", – dep túsindirdi ol.
Anthropic basshysy alańdaýǵa negiz bolatyn mysal retinde OpenAI–Hugging Face zertteýindegi jaǵdaidy atady. Onyń sipattaýynsha, tájiribe barysynda bir top JI-agent bastapqy tapsyrmada kórsetilmegen nysandarǵa kibershabýyl jasap, óz jumysyn baǵalaýǵa arnalǵan tetikti buzýǵa árekettengen. Bul joly aitarlyqtai shyǵyn kelmegen.
Alaida Amodeidiń boljamynsha, aldaǵy 6–12 aida múmkindigi joǵarylaǵan júie osyndai áreket jasasa, onyń saldary áldeqaida aýyr bolýy yqtimal.
"Aldaǵy 6–12 aida minez-qulqynda osyndai aqaýy bar qýatty júie turaqty botnet quryp, internet infraqurylymynyń edáýir bóligine shabýyl jasaýy múmkin. Mundai jaǵdaida yqtimal shyǵyn júzdegen milliard dollarǵa jetýi yqtimal", – dep eskertti kompaniia basshysy.
Dario Amodei jasandy intellektini qaýipsiz damytýǵa múmkindik beretin úsh kezeńnen turatyn baqylaý júiesin usyndy.
Birinshi kezeńde jetekshi JI-kompaniialardyń ishinde táýelsiz syrtqy sarapshylar turaqty jumys isteýge tiis. Olar modelderdi jáne olardy oqytý úderisin zerttep, yqtimal qaýipterdi baǵalap, anyqtalǵan oqiǵalardy tirkep, qorytyndylaryn kópshilikke jariialaýy kerek.
Amodeidiń málimdeýinshe, Anthropic mundai baqylaý tetigin óz erkimen engizýge daiyn. Kompaniia táýelsiz mamandarǵa keńseden jumys orny, korporativtik qurylǵylar jáne zertteýge qajetti ishki aqparat pen quraldarǵa qoljetimdilik berýdi josparlap otyr.
Ekinshi kezeńde demokratiialyq elderdegi iri JI-kompaniialar ortaq qaýipsizdik standarttaryn qabyldaýy qajet. Usynys boiynsha, modelderdiń múmkindigi artqan saiyn olardy odan ári damytýǵa nemese qoldanysqa engizýge qoiylatyn talap ta qatańdai túsýge tiis.
"Model qanshalyqty qaýipti múmkindikke ie bolsa, ony kelesi kezeńge ótkizer aldynda sonshalyqty jan-jaqty ári qatań tekserý qajet", – dep sanaidy Amodei.
Úshinshi kezeń memleketter arasyndaǵy halyqaralyq kelisimderdi qamtidy. Anthropic basshysy AQSh pen Qytaidy qosa alǵanda, jetekshi elder jasandy intellektini biologiialyq qarý ázirleýge paidalanýǵa tyiym salý jóninde kelisýi qajet dep esepteidi. Sondai-aq ozyq modelderdi kiberqaýipterge, biologiialyq jáne basqa da asa mańyzdy táýekelderge mindetti túrde synaqtan ótkizý usynyldy.
Sonymen birge Amodei jasandy intellektini damytýdy tolyǵymen toqtatýdy qoldamaidy. Ol tehnologiialyq básekede AQSh-tyń birjaqty artta qalýyna da qarsy ekenin jetkizgen. Osyǵan bailanysty Qytaiǵa ozyq JI-chipteri men olardy óndirýge arnalǵan jabdyqtardy jetkizýge qoiylǵan shekteýlerdi saqtaý, esepteý qýatynyń zańsyz tasymalyna tosqaýyl qoiý jáne eń qýatty modelderdiń parametrlerin urlanýdan qorǵaý qajettigin atap ótti.
"Maqsat – jasandy intellektini damytýdy toqtatý emes. Damý qarqynyn báseńdetý arqyly alynǵan ýaqytty modelderdiń senimdiligin arttyrýǵa, olardy tekserý ádisterin jetildirýge jáne qaýipsizdikti kúsheitýge jumsaýymyz kerek", – dedi Anthropic basshysy.
