Jetisý oblysynyń Jarkent qalasynda mektep aýmaǵynda oinap júrgen besinshi synyp oqýshysyn tok soǵyp, kóz jumdy. Qaiǵyly oqiǵaǵa bailanysty politsiia sotqa deiingi tergeý bastady, dep habarlaidy dalanews.kz.
Aldyn ala málimet boiynsha, oqiǵa 9 shildede qyz oqityn mekteptiń aýlasynda bolǵan. Bala oinap júrip, esigi qulyptalmaǵan transformatorlyq qosalqy stantsiiaǵa kirgen. Sol jerde ony elektr togy soqqan.
Zardap shekken oqýshy Jarkent qalalyq aýrýhanasynyń jansaqtaý bólimine jetkizildi. Alaida dárigerler onyń ómirin saqtap qala almady. Aldyn ala diagnoz retinde elektr togynan zaqymdaný tirkelgen.
Marqum qyz 10 shildede 10 jasqa tolýy tiis bolǵan.
Jetisý oblystyq politsiia departamentiniń málimetinshe, qaýipsizdik talaptaryna sai kelmeitin jumystardy oryndaý nemese qyzmet kórsetý deregi boiynsha sotqa deiingi tergeý júrgizilip jatyr.
Quqyq qorǵaý organdary nysandy paidalaný men onyń qaýipsizdigine jaýapty laýazymdy tulǵalardyń jaýapkershilik deńgeiin anyqtap jatqanyn habarlady. Oqiǵanyń barlyq mán-jaiyn jan-jaqty zertteýge baǵyttalǵan tergeý áreketteri jalǵasýda.
Sondai-aq anyqtalǵan zańbuzýshylyqtar men kemshilikterdi joiý jáne osyǵan uqsas qaiǵyly jaǵdailardyń aldyn alý úshin ýákiletti memlekettik organdarǵa nusqama joldanǵan.
Tergeý múddesine bailanysty ózge aqparat ázirge jariialanbaidy. Istiń barysy politsiia basshylyǵynyń baqylaýyna alyndy.
