Májilis depýtaty Edil Jańbyrshin janýarlarǵa qatigezdik kórsetkeni úshin jazany qatańdatý usynylǵanyn málimdedi, dep habarlaidy dalanews.kz.
Depýtat bul ózgerister Prezident Qasym-Jomart Toqaevtyń tapsyrmasynan keiin ázirlengenin aitty. Onyń sózinshe, qoǵamda janýarlarǵa jasalǵan qatygezdikke qatysty rezonansty jaǵdailar kóbeigen.
«Memleket basshysy Qasym-Jomart Kemeluly Toqaev janýarlarǵa qatigezdikpen qaraýǵa bailanysty jaýapkershilikti kúsheitý máselesin qoiǵan bolatyn. Qazir qoǵamda bul máselege bailanysty úlken rezonans bar», - dedi Edil Jańbyrshin.
Májiliste qaralyp jatqan zań jobasy aiasynda Qylmystyq kodeks pen Ákimshilik quqyq buzýshylyq týraly kodekske ózgerister engizý usynylǵan. Depýtattyń aitýynsha, kei baptar boiynsha aiyppuldar birneshe esege ósedi.
Sonymen qatar janýarlardy azaptap óltirgenderge qatysty qylmystyq jaza da kúsheitilmek.
«Buryn janýarlarǵa qatysty eń aýyr jaza eki jyl bolatyn. Qazir bes jylǵa deiin bas bostandyǵynan aiyrý máselesin usynyp otyrmyz. Múlkin tárkileý máselesi de qaralady», - dedi depýtat.
Jańbyrshin bul túzetýlerdiń basty maqsaty qoǵamǵa tártip ornatý jáne ósip kele jatqan urpaqqa úlgi kórsetý ekenin aitty.
«Kim janýarlarǵa qatygezdikpen qaraidy, kim durys qaramaidy, soǵan zań aiasynda qatań shara qoldanylatyn bolady», - dedi ol.
Depýtattyń aitýynsha, zań jobasy ekinshi oqylymǵa deiin áli de pysyqtalady.
