Qazaqstanda zańsyz qurylystardy anyqtaý úshin drondar qoldanylmaq, dep habarlaıdy Dala News.

Bul týraly brıfıńte Jannat Dýbırova málimdedi.

Onyń aıtýynsha, pılottyq joba Astanada júrgizilgen. Dron arqyly belgili bir aýmaq túsirilip, ol qalanyń bas jospary jáne egjeı-tegjeıli josparlaý jobasymen salystyrylǵan. Nátıjesinde tehnologıa zańsyz qurylystardy anyqtaı alatynyn kórsetken.

Júıe jasandy ıntellekt kómegimen ǵımarattardy tanyp, olardy josparlyq qujattarmen salystyrady. Bul tásildi endi qala kóleminde keńinen qoldaný múmkindigi qarastyrylyp jatyr.

Jınalǵan derekter keıin memlekettik sáýlet-qurylys baqylaý organdaryna jiberiledi. Olar naqty tekseris júrgizip, zań aıasynda shara qabyldaıdy.

Vıse-mınıstrdiń aıtýynsha, tehnologıa kúrdeli bolǵandyqtan, ony kezeń-kezeńimen engizý josparlanǵan. Bıyl aýqymdy testileý jalǵasady, al kelesi jyly barlyq qalada engizý jáne zańnamalyq bekitý kózdelip otyr.