Májilis depýtaty Ashat Aimaǵambetov dástúrli Tamyz keńesinde el prezidenti Qasym-Jomart Toqaevtyń ustazdarǵa qatysty kótergen máselesine bailanysty pikir bildirdi, dep habarlaidy Dalanews.kz.
"Memleket basshysy muǵalimderdiń quqyqtaryn qorǵaýdyń mańyzdylyǵyna taǵy da erekshe toqtalyp, prokýratýraǵa jergilikti bilik 2019 jyldan beri qoldanystaǵy, pedagogtardy ózderine tán emes jumystardan bosatatyn jáne olardyń quqyqtaryn qorǵaityn zań normalaryn buzǵan jaǵdailardy toqtatýdy tapsyrdy. Aimaqtardaǵy óreskel mysaldar – jazda muǵalimderdi sý qoimalarynyń qasynda kezekshilikke qoiý, mektep bitirý keshteri ótken meiramhanalarda kezekshilikke shyǵarý nemese qalalyq shyrshalardy bezendirýge jiberý– bul zańdy tikelei buzý bolyp tabylady. Ádettegidei, Memleket basshysy pedagogtardyń qorǵany boldy", – dedi depýtat.
Aimaǵambetovtyń aitýynsha, pedagogtardyń, mektep pen ata-ananyń jaýapkershiligin naqty ajyratý mańyzdy másele.
"Birneshe jyl buryn biz arnaiy zańǵa mektep pen ata-ana arasynda ár taraptyń quqyqtary men mindetteri naqty kórsetiletin shart jasaý normasyn engizdik. Alaida barlyq mektepter bul tetikti tiimdi paidalanyp otyrǵan joq, sonyń saldarynan kóbine "kináli" etip mektepti shyǵarady. Shyn máninde, eger jasóspirim sabaqtan tys ýaqytta quqyq buzýshylyq jasasa, direktordy nemese synyp jetekshisin jumystan bosatý– biyl birqatar óńirde oryn alǵanyndai– ádiletsiz ǵana emes, sonymen birge zańsyz", – dep jazdy ol.
Depýtattyń aitýynsha, biyl birqatar óńirde mundai jaǵdailar oryn alǵan. Sondyqtan mektep tek óz quzyretine kiretin máselelerge ǵana jaýap berýi kerek degen qaǵidatty naqty bekitý úshin arnaiy túzetýler daiyndalǵan.
"Prezident árqashan pedagogtar men mektepterge tolyq qoldaý kórsetip, ádiletti ustanymdy talap etedi: pedagog ózine qatysy joq oqiǵalar úshin jaýap bermeýi tiis. Búgin Memleket basshysy osy másele boiynsha naqty tapsyrma berdi. Bul– tek ádilet máselesi ǵana emes, sonymen birge muǵalimniń motivatsiiasyn, bedelin jáne el damýyn saqtaý máselesi", – dedi Aimaǵambetov.
Ol byltyr depýtattar muǵalimderdiń quqyqtaryn buzǵany úshin jaýapkershilikti kúsheitý týraly Ákimshilik quqyq buzýshylyq kodeksine túzetýler engizgenin, biraq ol kezde bastama qoldaý tappaǵanyn eske saldy.
"Búgin Prezidenttiń tapsyrmasynan keiin mundai ózgerister qabyldanatynyna senimdimin", – dedi depýtat.
Aimaǵambetovtiń sózinshe, bilim berý – strategiialyq sala. «Munda usaq-túiek joq: muǵalimniń quqyǵyn qorǵaýdan bastap mekteptegi tamaqtaný sapasyna deiin, interaktivti taqtalardan jasandy intellekt kýrstaryna deiin – munyń bári eldiń bolashaǵyna salynǵan investitsiia», – dep túiindedi ol.
