Búgin Qyzylordada «Oǵyzdardyń materialdyq jáne rýhani mádenieti» atty ǵylymi-tanymdyq kitap-katalogynyń tanystyrylymy ótti, dep habarlaidy dalanews.kz.
Sondai-aq, «Jankent arheologiialyq ekspeditsiiasyna – 20 jyl» atty halyqaralyq ǵylymi-tájiribelik dóńgelek ústel uiymdastyryldy.
Shara oǵyzdardyń rýhani mádenietin jurtshylyqqa keńinen nasihattaýǵa, Jankenttiń tarihi-arheologiialyq murasyn ǵylymi turǵyda zerdeleýge, otandyq jáne sheteldik ǵalymdar arasyndaǵy ózara yntymaqtastyqty nyǵaitýǵa baǵyttaldy.
Qatysýshylar arnaiy uiymdastyrylǵan «Jankent qalasynyń jádigerleri» atty kórmeni, «Aptap ystyq kún astynda Jankentte ótken 20 jyl» fotokórmesin tamashalady. Onda arheologiialyq jádigerler jáne ekspeditsiianyń jiyrma jyldyq zertteý jolyn beineleitin fotosýretter qoiylǵan.
Jiynǵa Resei, Germaniia, Ulybritaniia, Ózbekstan jáne elimizdiń ár óńirinen kelgen ǵalymdar qatysyp, Jankent qalashyǵyn zertteý barysynda jinaqtaǵan ǵylymi eńbekterin tanystyrdy. Ashylý rásimine oblys ákiminiń keńesshisi Rýslan Rústemov, Qorqyt Ata atyndaǵy Qyzylorda ýniversitetiniń basqarma tóraǵasy – rektor Naýryzbai Baiqadamov, Á.H. Marǵulan atyndaǵy Arheologiia institýtynyń bas direktory, tarih ǵylymdarynyń kandidaty Aqan Ońǵaruly jáne Eberhard Karl atyndaǵy Tiýbingen ýniversitetiniń qurmetti professory Heinrich Haerke qatysyp, Jankentti zertteýdiń tarihi ári ǵylymi mańyzyna toqtaldy.
«Oǵyzdardyń materialdyq jáne rýhani mádenieti» ǵylymi-tanymdyq kitap-katalogynda oǵyzdardyń tarihy men rýhani mádenieti, turmys-tirshiligi, qolóneri men murasy keńinen qamtylǵan. Sonymen qatar Jankent qalashyǵynda júrgizilgen kópjyldyq arheologiialyq zertteýlerdiń nátijesi júielenip, qundy arheologiialyq jádigerler týraly ǵylymi málimetter usynylǵan.
Dóńgelek ústeldiń ekinshi bóliminde otandyq jáne sheteldik ǵalymdar Jankent pen Syr óńirindegi ortaǵasyrlyq qalalardyń tarihy men arheologiiasyna qatysty zertteý nátijelerin ortaǵa saldy. Máskeý, Tiýbingen, Liverpýl, Samarqan, Astana, Almaty, Shymkent jáne Qyzylorda zertteýshileri ózara tájiribe almasyp, Jankenttiń Syrdariianyń tómengi aǵysyndaǵy ortaǵasyrlyq qalalar júiesindegi orny men oǵyzdar tarihyn zerdeleýdegi mańyzyna qatysty jańa ǵylymi tujyrymdaryn usyndy.
Jiyrma jyldyq zertteý barysynda jinaqtalǵan mol ǵylymi material Jankent tarihyn jańa qyrynan zerdeleýge múmkindik berip, oǵyz órkenietiniń Syr óńirindegi tarihi-mádeni ornyn tereńirek túsinýge jol ashty.
Ǵylymi basqosý qorytyndysynda zertteýshiler birqatar usynys aityp, tiisti rezoliýtsiia qabyldandy.
