QMA-nyń Mańǵystaý oblysy boiynsha departamenti Jańaózen qalalyq kópbeiindi aýrýhanasyna demeýshilik kómek retinde bólingen qarajattyń jymqyrylýyna qatysty tergeý júrgizip jatyr, dep habarlaidy dalanews.kz.
2025 jyly Mańǵystaý oblysynyń Densaýlyq saqtaý basqarmasy kúiik bólimshesin ashýǵa demeýshilik kómek kórsetý týraly «QazMunaiGaz» UK» AQ-ǵa ótinish jasaǵan. Jobany iske asyrýǵa 223 mln teńge bólinip, ony «ÓzenMunaiGaz» AQ «Jarylqaý» qoǵamdyq qoryna aýdarǵan.
Bastapqyda joba aiasynda meditsinalyq jabdyqtyń segiz túrin satyp alý jáne mamandardy oqytý kózdelgen. Alaida keiin jobanyń sharttary ózgertilip, bólimsheni keshendi túrde jabdyqtaýdyń ornyna qoǵamdyq qor, qalalyq aýrýhana jáne «AKBS Invest» JShS arasynda jalpy quny 210 mln teńge turatyn, kúiikke shaldyqqan naýqastarǵa arnalǵan nebári eki arnaiy kereýet satyp alý jóninde úshjaqty shart jasalǵan.
Bul rette satyp alý zań talaptaryn ainalyp ótip júrgizilgen. Óitkeni mundai baǵadaǵy meditsinalyq tehnikany zańnamaǵa sáikes Biryńǵai distribiýtor arqyly satyp alý qajet. Tergeý dereginshe, zańsyz iske qalalyq aýrýhana direktorynyń orynbasary, «Jarylqaý» qoǵamdyq qorynyń basshysy, Jańaózen qalasy ákiminiń burynǵy orynbasary jáne ónim berýshi qatysy bar.
Jabdyq satyp alýǵa nebári 92 mln teńge jumsalǵan. Tergeý nusqasy boiynsha, qalǵan qarajat úlestes kásiporyndar arqyly qolma-qol aqshaǵa ainaldyrylyp, iske qatysýshylar arasynda bólingen.
«AKBS Invest» JShS ókili qylmystyq jolmen túsken qarajatqa elordadan páter satyp alyp, ony úshinshi tulǵalardyń atyna rásimdegen. Jańaózen qalasy ákiminiń burynǵy orynbasaryna qatysty QR Qylmystyq kodeksiniń 361-baby boiynsha laýazymdyq ókilettikterin teris paidalaný deregimen tergeý bastaldy.
Úsh kúdikti qamaýǵa alyndy. Sottyń sanktsiiasymen olardyń múlkine, sonyń ishinde 3 páterge, 2 turǵyn úige jáne avtokólikke tyiym salyndy.
Tergeý jalǵasyp jatyr. QR Qylmystyq-protsestik kodeksiniń 201-babyna sáikes ózge aqparat jariia etilmeidi.
