9 qyrkúiekte Geologiialyq klasterdiń aýmaǵynda 2026 jyly «Ulytaý ýniversiteti» KEAQ-ǵa oqýǵa túsken «Qazaqmys korporatsiiasy» JShS men onyń enshiles kompaniialarynyń jumyskerleri úshin jańa oqý jylynyń ashylý rásimi ótti. Qatysýshylar ýniversitettiń bilim berý modelimen, oqý úderisin uiymdastyrý tártibimen jáne bilim berý infraqurylymymen tanysty, dep habarlaidy dalanews.kz.
Ýniversitettiń alǵashqy stýdentteriniń legine 163 bilim alýshy kirdi. Onyń ishinde korporatsiia kásiporyndarynda jumys istep júrgen 103 qyzmetker bar. 52 qyzmetker ekinshi joǵary bilim alý úshin bakalavriat baǵdarlamasyna qabyldansa, taǵy 51 stýdent – «Qazaqmys» korporatsiiasynyń Tehnologiialyq kolledjiniń túlegi. Olar úshin buryn alǵan bilimi men praktikalyq tájiribesin eskeretin qysqartylǵan bilim berý traektoriiasy qarastyrylǵan.
Oqý protsesiniń negizgi ereksheliginiń biri – dýaldy oqytý júiesiniń elementteri qamtylǵan tájiribege baǵyttalǵan tásil. Teoriialyq daiyndyq óndiristik nysandardaǵy praktikamen ushtastyrylady. Bul stýdentterge naqty óndiristik mindetpen jumys istep, alǵan bilimin birden kásiporynda qoldanýǵa múmkindik beredi.
Jumys istep júrgen qyzmetkerler úshin mundai model kásibi qyzmetin joǵary bilim alýmen qatar alyp júrýge jaǵdai jasaidy. Bilim berý traektoriiasyn qalyptastyrý kezinde qyzmetkerlerdiń óndiristik tájiribesi men buryn meńgergen pánderi eskeriledi.
«Ulytaý ýniversiteti» KEAQ Basqarma tóraǵasy – Rektor Aidos Sákenov Qazaqmyspen yntymaqtastyq ornatý taý-ken metallýrgiia salasynyń qajettiligin eskere otyryp, injenerlik-tehnikalyq maman daiarlaýǵa negiz qalyptastyratynyn atap ótti.
Bizdiń maqsatymyz tek diplom berý ǵana emes, sonymen qatar taý-ken ónerkásibin túsinetin, óndiristik máselelerdi sheshe alatyn, zamanaýi tehnologiialardy jetik meńgergen jáne bolashaqta korporatsiianyń injenerlik jáne basqarýshylyq áleýetin nyǵaita alatyn mamandardy daiarlaý. Sizder osy modeldiń alǵashqy qatysýshylarynyń qataryndasyzdar», - dedi Aidos Sákenov.
Qazaqmys úshin ýniversitetpen seriktestik – kadrlyq áleýetti damytý, jumyskerlerdiń biliktiligin arttyrý jáne kásibi kadr rezervin qalyptastyrý quralynyń biri. Aldaǵy ýaqytta praktikalyq daiarlyqty keńeitý, kásiporyn mamandaryn bilim berý úderisine tartý jáne oqý barysynda naqty óndiristik keisterdi paidalaný josparlanýda.
