QR Prezidenti janyndaǵy Ortalyq kommýnikatsiialar qyzmeti iske qosqan podkastta kóterilgen máselelerdiń biri IIM ishindegi sybailas jemqorlyqqa qarsy kúres boldy. IIM basshysy Erjan Sádenov jaqynda Qostanaida tártip buzǵan júrgizýshi men politseiler arasynda bolǵan oqiǵaǵa qatysty túsinikteme berdi. Júrgizýshi IIM Akademiiasynyń tyńdaýshysy bolyp shyqqan, - dep habarlaidy Dalanews.kz.
«Esterińizge sala keteiin, politsiianyń mindeti – qylmystyń aldyn alý, ashý, tergeý, iaǵni qoǵamdaǵy zańdylyqty saqtaý. Qylmys pen politsiia syiyspaityn uǵymdar. Qostanaidaǵy jaǵdaiǵa toqtalsaq, bul tyńdaýshynyń, iaǵni tártip buzǵan júrgizýshiniń bolashaǵy bar edi. Akademiiada magistratýrada oqyp júrse, osyndai áreketke barmasa, onda óser edi. Mundai jaǵdailarda biz nóldik tózimdilik tanytamyz. Tiisinshe, ol ishki ister organdarynan shyǵaryldy. Tabandylyq tanytpaǵan qyzmetkerler de jazalandy. Biz zańdy buzǵan politsiia qyzmetkerlerine nóldik tózimdilikpen qaraimyz. Bul jumys jalǵasady», – dedi ol.
Onyń aitýynsha, vedomstvo ishinde sybailas jemqorlyqpen kúresý úshin birqatar aldyn alý sharasy qabyldanyp, tálimgerlik institýty belsendi qoldanylady.
«Byltyr Kadrlyq áleýetti arttyrý jylyn jariialaǵanymyzdy aita ketken jón. Iaǵni, bizde kim qyzmet etetinin, mundai jaǵdailardyń qalai aldyn alý kerek ekenin anyqtadyq. Integrity check degen uǵymdy engizdik, iaǵni jyl saiyn adaldyqqa tekseremiz. Sybailas jemqorlyqqa qarsy qyzmetpen birlesken is-sharalar jospary bar», – dep atap ótti Erjan Sádenov.
Onyń aitýynsha, bir ǵana jaǵymsyz jaǵdai ózge tártip saqshylarynyń myńdaǵan erligin «joq qylady». Ministrdiń aitýynsha, qoǵamdyq jazǵyrý zań men tártipti buzýdyń aldyn alýǵa kómektesedi. Áldeqaida aýyr quqyq buzýshylyqtyń alǵysharttary bolýy yqtimal árbir jaǵdai ofitserler jinalysynda qaralady.
«Isine uqypsyz qyzmetkerler bolady, satqyndar da bolady. Bul turǵydan da jumys júrgiziledi. Zań aldynda bári birdei. Bul normalar bizge de qatysty. Tártipti buzsań, ol úshin jaýap berýiń kerek. Sondyqtan, qaitalap aitamyn, quqyq buzýshylyq pen politsiia – bul syiyspaityn uǵymdar», – dep túiindedi IIM basshysy.
