Tarazda jýrnalist Aijan Áýelbekovany Ákimshilik quqyq buzýshylyq týraly kodekstiń 456-2-baby boiynsha hattama toltyrý úshin politsiiaǵa shaqyrǵan. Bul týraly jýrnalist áleýmettik jelidegi paraqshasynda málimdedi, dep habarlaidy dalanews.kz.
Onyń aitýynsha, ákimshilik is qozǵaýǵa Shý aýdanynda kómek suraǵan adam týraly jariialanymy sebep bolǵan. Jýrnalist buǵan deiin álgi azamattyń ózin quldyqta ustap otyrǵanyn aitqanyn jazyp, aqparattyń anyq-qanyǵyn tekserý úshin tiisti organdarǵa habarlasqan.
"Maǵan kómek suraǵan adam týraly jariialanymnan keiin jazylǵan aryz negizinde ÁQBtK-niń 456-2-baby boiynsha ákimshilik hattama toltyrý úshin politsiiaǵa shaqyryp jatyr", – dep jazdy Aijan Áýelbekova.
Jýrnalistiń sózinshe, osy ýaqytqa deiin ony ózine qatysty jazylǵan aryzben jáne istiń basqa materialdarymen tiisti tártipte tanystyrmaǵan. Sondyqtan ol jazbasyndaǵy naqty qai sózderdiń zańbuzýshylyq retinde baǵalanǵanyn bilmeitinin aitady.
"Maǵan hattama toltyrý úshin kelýdi usynyp otyr. Biraq ázirge taǵylǵan kinániń mánin túsinýge múmkindik bermedi. Iaǵni maǵan kimniń jáne mátindegi naqty qandai sózderge shaǵymdanǵany belgisiz", – dedi ol.
Aijan Áýelbekova daýly jazbasynda qandai da bir qylmystyń bolǵanyn naqty fakt retinde kórsetpegenin, eshkimdi qylmysker dep atamaǵanyn atap ótti. Onyń aitýynsha, jariialanymnyń maqsaty – qiyn jaǵdaiǵa tap bolýy yqtimal adamǵa nazar aýdartyp, aqparattyń quzyrly organdar tarapynan tekserilýine yqpal etý.
"Men qandai da bir qylmys naqty boldy dep málimdegen joqpyn, eshkimdi qylmysker dep atamadym jáne boljamdy dáleldengen derek retinde usynbadym. Mátinde quzyrly organdar tekserýge tiis yqtimal jaǵdai týraly ǵana aityldy", – dep túsindirdi jýrnalist.
Ol aqparat qolyna tigen boida quqyq qorǵaý organdaryna habarlasyp, málimetterdi solarǵa joldaǵanyn jetkizdi. Jýrnalistiń jazýynsha, bul jaǵdaiǵa qatysty video, aýdiohabarlamalar jáne kómek suraǵan adamnyń ornalasqan jeri týraly derekter bar. Sondai-aq politsiia men Jambyl oblysynyń prokýratýrasy buǵan deiin onyń saýaldaryna bergen jaýaptarynda qylmystyq is qozǵalǵanyn habarlaǵan.
"Jaǵdaidyń shyn máninde qalai bolǵanyn anyqtaý – jýrnalistiń emes, tiisti qyzmetterdiń mindeti. Jariialanymnyń maqsaty qiyn jaǵdaiǵa tap bolýy nemese zańsyz árekettiń qurbany bolýy múmkin adamǵa nazar aýdartý edi", – dedi Aijan Áýelbekova.
Jýrnalist quqyq qorǵaý organdarymen sóilesýden bas tartpaitynyn, alaida istiń zań aiasynda obektivti qaralýyn talap etetinin málimdedi.
