Almatyda jaiaý júrginshiler joldan ótip bara jatqan sátte kóligimen drift jasaǵan júrgizýshi 20 táýlikke ákimshilik qamaýǵa alyndy, dep habarlaidy dalanews.kz.
Quqyq buzýshylyq júrgizýshiniń áleýmettik jelige ózi jariialaǵan beinejazbasy arqyly anyqtalǵan. Kadrlardan onyń qiylysta kólikti qasaqana kóldeneń syrǵytyp, qaýipti manevr jasaǵanyn kórýge bolady. Sol sátte jaiaý júrginshiler baǵdarshamnyń ruqsat belgisimen joldan ótip bara jatqan.
Buǵan qosa, beinejazbada balaǵat sózder aitylǵan. Almaty politsiiasy júrgizýshiniń jeke basyn anyqtap, ony jol qozǵalysy erejesin óreskel buzǵany jáne usaq buzaqylyq jasaǵany úshin jaýapqa tartty.
Sot sheshimimen quqyq buzýshy 20 táýlikke qamaldy.
"Jol – kópshilikke kólik júrgizý sheberligin kórsetetin oryn emes. Qaýipti áreketti áleýmettik jelige jariialaý jaýapkershilikten bosatpaidy. Kerisinshe, mundai beinejazbalar quqyq buzýshylyqtyń mán-jaiyn anyqtaýǵa kómektesedi. Jol qaýipsizdigi talaptary barshaǵa ortaq", – dep málimdedi politsiia departamenti.
