Izrail qorǵanys ministri Israel Kats Livan astanasy Beirýtke eskertý jasap, «Hezbolla» tarapynan raketalyq jáne dron shabýyldary toqtamasa, Izrail aýmaqty basyp alýy múmkin ekenin málimdedi, dep habarlaidy Dala News.
Ministrdiń aitýynsha, Izrail áskeri shabýyldarǵa jaýap retinde Livandaǵy nysandarǵa soqqy berýdi kúsheitýge daiyn.
Buǵan deiin Izrail aviatsiiasy Beirýttiń ortalyǵyndaǵy, úkimet ǵimaratyna jaqyn ornalasqan eki nysandy atqylaǵan. Bul soqqylar «Hezbolla» jasaǵan sońǵy ýaqyttaǵy eń iri raketalyq shabýyldan keiin jasaldy.
Livan biliginiń málimetinshe, Izraildiń eldiń ońtústigi men shyǵysyna, sondai-aq Beirýttiń «Hezbolla» baqylaýyndaǵy aýdandaryna jasaǵan soqqylary saldarynan shamamen 700 adam qaza tapqan.
Sonymen qatar Izrail jappai evakýatsiia jariialap, Zahrani ózeniniń ońtústigindegi turǵyndarǵa úilerin tastap ketý týraly buiryq bergen. Nátijesinde 800 myńnan astam adam óz úilerin tastap ketken.
Izrail armiiasy «Hezbollaǵa» qarsy operatsiiany ótken aptada bastady. Buǵan 2 naýryzda toptyń Izrail aýmaǵyna raketa atýy sebep bolǵan.
Izrail áskeri kúshteriniń málimetinshe, «Hezbolla» Iranmen birlesip 200 raketa men 20 dron ushyrǵan, al Iran Izrailge ballistikalyq zymyrandarmen shabýyl jasaǵan.
Buǵan deiin Irannyń jańa joǵarǵy kóshbasshysy Modjtaba Hamenei Tegeran qaza tapqandar úshin kek alatynyn jáne Ormýz buǵazy jabyq kúiinde qalatynyn málimdegen.
