Qyrǵyzstannyń Ystyqkól oblysynda bes avtokóliktiń qatysýymen iri jol apaty bolyp, úsh adam qaza tapty. Marqumdardyń arasynda 16 jastaǵy qyz ben eki kishkentai bala bar, dep habarlaidy Turmush.
Jol-kólik oqiǵasy 19 shildede Ton aýdanyna qarasty Qara-Talaa jáne Shor-Bulaq aýyldarynyń arasynda bolǵan. Apat Balyqshy – Bókónbaev – Qarakól avtojolynyń 33-shaqyrymynda tirkeldi.
Rastalǵan málimet boiynsha, jol apatynan 16 jastaǵy qyz, biyl dúniege kelgen náreste jáne tórt jastaǵy ul bala kóz jumǵan.
Oqiǵa saldarynan barlyǵy 12 adam zardap shekti. Úsh adam qaza taýyp, qalǵandary Balyqshy qalasyndaǵy aýrýhanaǵa jetkizilgen.
Dárigerlerdiń aitýynsha, zardap shekkenderdiń úsheýi áli statsionarda em qabyldap jatyr. Olardyń biri jansaqtaý bóliminde bolsa, taǵy eki adam travmatologiia bólimindegi operatsiiaǵa daiyndalyp jatyr. Qazirgi ýaqytta olardyń jaǵdaiy birshama turaqtalǵan.
Qalǵan jolaýshylar dárigerlerdiń tekserýinen keiin ambýlatoriialyq em alýǵa jiberilgen.
Aldyn ala málimetke sáikes, Hyundai Palisade jáne Chevrolet avtokólikteri batystan shyǵysqa qarai qozǵalyp kele jatyp, qarsy baǵyttaǵy jolaqqa shyqqan. Saldarynan olar shyǵystan batysqa qarai kele jatqan Honda Stream, Chevrolet Spark jáne Volkswagen Vento kólikterimen soqtyǵysqan.
Jol apaty Ton aýdandyq ishki ister bóliminde tirkeldi. Qazirgi ýaqytta oqiǵanyń mán-jaiyn anyqtaýǵa baǵyttalǵan tergeý júrgizilip jatyr.
