Seminarda negizgi máseleler talqylanyp, Taldyqorǵan ortalyq «Iman» meshitiniń ustazy Hamit Tabarak «Sháriǵat jáne pátýa taǵylymy», «Ihsan ilimi–rýhani kemeldený joly» men «Aqida» ilimindegi týra jáne aýyspaly maǵynaly aiattardyń tápsirin¹ túsindirse, islamtanýshy, JANT múshesi Erejep Jardybaiuly «Din men dástúr tutastyǵy» taqyrybynda dáris oqydy.
«QMDB-nyń kontseptýaldy qujattary» atty seminar bóliminde JANT músheleri Hamit Tabarak, Erejep Jardybaiuly jáne «Nur» meshitiniń bas imamy Janserik Alpysbaev jergilikti imamdardan emtihan alyp, artynsha dáris alǵanyń rastaityn sertifikattaryn tabystady.
Islam dini–memlekette tynyshtyq pen ádildiktiń bolýyn kózdeidi. Búgingi kúni elimizdegi barlyq meshitter men medreseler beibitshilik pen birlikti nyǵaitý jolynda úzdiksiz qyzmet etip keledi. Halyqty qanattandyryp otyratyn ustazdardyń taǵylymdy kezdesýleri aýdandyq ardagerler úiinde el erteńi-jastar qaýymymen jalǵasyn tapty.
Kezdesýde «Iman» meshitiniń ustazy Erejep Jardybaiuly «Imandylyq iirimderi» jáne «Islam–yntymaq pen birlik» taqyrybynda oi órbitse, qalalyq ákimdiktiń májilis zalynda islamtanýshy, ustaz Habit Tabarak «Qazaq halqynyń rýhani qundylyǵy», «Din men dástúr» jáne «Jat aǵymnan saqtaný» taqyryby aiasynda jas býynǵa ýaǵyz-nasihat aitty.
Keleli kezdesýde aýdannyń bas imamy Ánet Omarhanuly, aýdandyq ardagerler keńesiniń múshesi Tezekbai Janasyluly, aýdandyq analar keńesiniń tóraiymy Uljalǵas Býrasanqyzy men aqparattyq túsindirý tobynyń múshesi Almat Ashatuly «Islam dininiń kemeldigi», «Otbasy tárbiesindegi ulttyq qundylyqtar», «Dástúr men urpaq tárbiesi–ulttyq ideologiianyń negizi» men «Jastar jáne dástúr» taqyryptary aiasynda jas urpaqqa taǵylymdy tálim-tárbie beretin júieli oilaryn ortaǵa salyp, pikirlerimen bólisti.
¹ «Tápsir» sózi tildik maǵynada–«ashyqtaý», «baiandaý» degendi bildiredi. Sózdikte «tápsir» sózi jabylǵan nárseniń betin jáne túsiniksiz bolǵan sózdiń maǵynasyn ashý degenge de keledi.
K.Arstan,
Alakól aýdany ákiminiń baspasóz hatshysy
