Qazyǵurt aýdany Sharbulaq aýylyndaǵy «Qaıyp ata» mal bordaqylaý kesheninde ótken kóshpeli semınarǵa Iran elinen kelgen ınvestorlarmen qatar aýdan, qala ákimderi, aýyl sharýashylyǵy basqarmasynyń mamandary, sharýa qojalyq ıeleri jáne ǵylymı ortalyqtar men nesıelik qarjy ınstıtýttarynyń ókilderi qatysty.
Semınardyń maqsaty - sharýalar men memlekettiń arasyndaǵy qarym-qatynasty nyǵaıta otyryp, aýyl sharýashylyǵynyń damýyna serpin berý. Usaq sharýa qojalyqtarynyń birigýine múmkindik jasap, sol arqyly ónim kólemin arttyryp otandyq taýardy shetelge eksporttaý.
«Elimizde aýyl sharýashylyǵymen onyń ishinde mal sharýashylyǵymen aınalysatyn sharýalarǵa memleket tarapynan qoldaý joǵary dengeıde. Osy oraıda aýyl sharýashylyǵy kooperatıvterin qurý, nesıeleý jáne sýbsıdıalaý máselelerin halyqqa túsindirip sharýalardy ata kásipke baýlý qajet. Ekologıalyq turǵydan taza ónim sanalatyn bizdiń ónimderimizge ózge elderdiń suranysy óte joǵary. Osyny tıimdi paıdalanýymyz kerek», -dedi Janseıit Qanseıituly.
Semınarǵa kelgen ǵalymdar men bilikti mamandar mal tuqymyn asyldandyrý boıynsha tájirıbelerimen bólisip ,sharýalardy tolǵandyratyn saýaldarǵa jaýap beredi. Kóshpeli semınarǵa jınalǵandar «Qaıyp ata» mal bordaqylaý keshenin aralap atqarylyp jatqan jumystarmen tanysty.
Aıta keteıik, Qazǵurt aýdanyndaǵy «Qaıypata» ceriktestigi negizinen mal bordaqylaýmen aınalysady. Búgingi tańda munda 3 myń bas iri qara bordaqylanyp jatyr. Mal bordaqylaý alańyndaǵy aqbas sıyrlar orta eseppen 300-350 kelige deıin et beredi. Etti malǵa tán belgileri de aıqyn – tez jetiledi, keýdesi keń, etti, aıaqtary qysqa, berik keledi. Urǵashy taıynsha kúnine 700-800 gram, 15-18 aılyq buqalashtar táýligine 900 gramǵa deıin salmaq qosady. Árıne, ol úshin malǵa durys kútim qajet. Soltústikten jetkizilgen iri qaranyń baby bolǵandyqtan, kúngeıdiń klımatyna tez jersingen.
Iran Islam memleketi jylyna 2 mln. 400 tonna et tutynady. Osy qajettiliktiń bir bóligin qamtý maqsatynda, eki tarap kúnine 3000 bas usaq mal eti men 100 bas men iri qara etin alý úshin kelisim shart jasasty. Bul óz kezeginde, el ekonomıkasyna oń yqpalyn tıgizip, Elbasynyń et eksportyn arttyrý mindetin júzege asyrýǵa múmkindik beredi.
Sonymen qatar, aldaǵy ýaqytta óńirimizde iriqara mal qaýymdastyǵyn qurý kózdelip otyr. Óıtkeni oblysymyzda sońǵy eki jylda iri qara mal sany 35 myńǵa artyp, 865 myń basty, qoı-eshki 155 myńǵa artyp 3 mln. 893 myńǵa, jylqy 16 myńǵa artyp 230 myńǵa, túıe 1,7 myń artyp 23 myńǵa jetip otyr.
OQO ákiminiń baspasóz qyzmeti
