Oqý-aǵartý ministri Juldyz Súleimenovanyń mekteptegi hidjabqa qatysty málimdemesi áleýmettik jelide úlken daý týǵyzdy. Jekemenshik mektepterdi litsenziiadan aiyrý jónindegi eskertýge narazy bolǵandardyń biri Qazaqstanǵa qarǵys aitsa, endi biri ministrge qatysty aýyr pikir jazdy, dep habarlaidy dalanews.kz.
8 qyrkúiekte Úkimettegi brifing barysynda ministr Juldyz Súleimenova mektep formasyna qoiylatyn talaptar memlekettik jáne jekemenshik bilim berý uiymdarynyń barlyǵyna ortaq ekenin málimdedi.
"Bizde biryńǵai mektep formasy bar. Barlyq mektep osy erejeler men talaptardy saqtaýy tiis. Buǵan deiin mundai jaǵdailar tirkelgen, qazir olar boiynsha jumys júrgizip jatyrmyz. Bul jumysqa Ulttyq qaýipsizdik komiteti de qatysady. Ákimdikter jáne jergilikti atqarýshy organdarmen birlesip jumys isteitin arnaiy komissiia bar", – dedi ministr.
Onyń aitýynsha, ótken oqý jylynda keibir jekemenshik mektepterde oqýshylardyń hidjab kiiýine ruqsat berý derekteri anyqtalǵan. Alaida jańa oqý jyly bastalǵaly mundai jaǵdai tirkelmegen.
Jýrnalister hidjabqa ruqsat bergen jekemenshik mektepterge qandai shara qoldanylatynyn surady. Ministr mundai jaǵdaida mekteptiń litsenziiasynan aiyrylýy múmkin ekenin jetkizdi.
"Litsenziialaý máselesi bar. Iaǵni litsenziiasyn qaitaryp alý múmkindigi qarastyrylady. Budan bólek te birqatar tetik bar. Olardy tiisti organdarmen birlesip pysyqtaimyz", - dedi Juldyz Súleimenova.
Ministrdiń sózi áleýmettik jelide ekiudai reaktsiia týdyrdy. Keibir qoldanýshylar barlyq bilim berý uiymy zaiyrlylyq qaǵidaty men biryńǵai mektep formasyna qoiylatyn talapty saqtaýy kerek ekenin jazdy. Al qarsy pikir bildirgender oramal taqqan oqýshyny bilim alý múmkindiginen shekteýge bolmaitynyn alǵa tartty.
Talqylaý barysynda shekten shyqqan jazbalar da jariialandy. Threads jelisindegi qoldanýshylardyń biri ministrdiń áreketin islamǵa qarsy shyǵýmen teńestirdi.
"Osy adamnyń jáne jaqyndarynyń janazasyn shyǵarǵan imamdar islamǵa qarsy shyqqanmen teń!" – dep jazdy carbon.ai8 esimdi qoldanýshy.
Al Qaraǵandydaǵy Jambyl atyndaǵy mamandandyrylǵan mektep-internatynyń informatika páni muǵalimi Jarqyn Ábdikarimov Qazaqstan men onyń halqyna qarǵys tilegen.
"Qazaqtarǵa, Qazaqstanǵa Allanyń myqty bir azaby kerek bolyp tur. Kúshti bir ekonomikalyq zardap shegetin, ekonomikasy quldyrap ketetin. Iá, Alla, kúiretshi! Ámin", – dep jazdy ol áleýmettik jelidegi paraqshasynda.
Keiin Jarqyn Ábdikarimov bul jazbasyn óshirip tastady. Qaraǵandylyq jýrnalist Aisultan Jaqyp muǵalimmen kezdesip, mundai pikirdi ne sebepti jazǵanyn surady. Ábdikarimov sózin ashýǵa berilip aitqanyn jetkizip, Qazaqstan halqynan keshirim surady.
"Ol jazba ashýmen jazyldy. Imandy bolǵannan keiin be, oramalǵa qatysty bolǵan soń ba, ashýmen sondai aqparat ketip qaldy. Sondyqtan qazaq elinen keshirim suraimyn. Qatty emotsiiaǵa berilip ketkennen keiin jazdym. Árkimniń ashýy bolady ǵoi. Sondai sátte emotsiiamdy ustai almai qalǵan siiaqtymyn. Men óz elimdi jaqsy kóremin, patriotpyn. Óz elime eshqandai qarǵys tilemeimin, elimdi jamandamaimyn", – dedi ol.
