Shyńnyń men tanymaımyn alasasyn,
Tóbe de alasamen talasasyń.
Tán-SHannyń shashaqtaýly naızasyndaı
Qaısyń Han táńirimen janasasyń?
Shyńnyń men unatamyn bıiktigin,
Shyrqaı kep shyńyraý kókten súıipti Kún.
Túndigin túrtip turǵan kók aspannyń,
Qanekı, Han táńirinen ıyqty kim?!
Egerde qudiret bolsa, bólshegindeı
(Aldynda qudirettiń kór sheginbeı.)
Shanshylyp áneý turǵan Han táńiri -
Shapshyǵan Tán-SHannyń emshegindeı.
Kún de onyń baýraıynda dóńgelegen,
Býaldyr, bozǵyl sháıi perdelegen.
Boıynda Hantáńiriniń buǵyp jatqan,
Alapat aıanysh bar jerge degen.
Tik tur ol.Qyryn qarap saı-salaǵa,
Kún kórki, Kók - mekeni, Aı - shaǵala.
Qalǵymaı qansha jyldy ótkerdi eken
Tákappar Tán-SHandaǵy qaısar aǵa?
Taýdyń men unatpaımyn tapaldyǵyn,
Tapaldan talaılar-aq tatar juǵyn.
Súıem men tabıǵattyń ulylyǵyn,
Súıem men tabıǵattyń qataldyǵyn!
Muqaǵalı Maqataev
