Depýtat Rinat Zaiytov Bas prokýror Berik Asylovqa depýtattyq saýal joldap, keibir quzyrly organdar halyqtyń muń-muqtajyna nazar aýdarmai otyrǵanyn jetkizdi, - dep habarlaidy Dalanews.kz.
Rinat Zaiytov Prezident joldaýynda aitylyp júrgen tapsyrmalardyń biri – «ashyqtyq pen ádilettilikti» iske asyrýda Úkimet músheleri men ózge memlekettik organdary mardymsyz jumys jasap otyrǵanyna kún saiyn kóz jetip otyrǵanyn málimdedi.
"Parlament Májilisi halyqpen tikelei bailanysta bolǵandyqtan juma saiyn jurttyń aryzyn tyńdap, ótinishterin qabyldaidy. Solardyń basym kópshiligi belgili bir vedomstvo basshysynyń qabyldaýyna kirý. Sebebi, óńirlerdegi jáne alyp megapolisterdegi sholaq belsendi, ortasha deńgeidegi qyzmetkerlerdiń «ózim bilemdikke» salyp zań buzýy azaiatyn emes. Oǵan mysalymyz da, dálelimiz de jetip artylady.
Buǵan toqtaý qoiatyn Bas prokýratýra, Joǵarǵy Sot pen ministrlerdiń esigi halyq kelgende bir ashylǵan emes. Bul qalai? «Estýshi Úkimet» qaǵidatyn ustanýdy tapsyrǵan Memleket basshysynyń sózi eskerilýge de tatymaǵany ma?" - dedi depýtat.
Zaiytovtyń sózinshe, QR ÁRPK 90-babynyń 1-tarmaǵyna sáikes memlekettik organdardyń basshylary jáne olardyń orynbasarlary tiisti memlekettik organnyń basshysy bekitetin qabyldaý kestesine sáikes aiyna keminde bir ret azamattardy jáne zańdy tulǵalardyń ókilderin, onyń ishinde osy organdardyń qyzmetkerlerin jeke qabyldaýdy júrgizýge mindetti.
«Qazaqstan Respýblikasynyń sot júiesi men sýdialarynyń mártebesi týraly» Qazaqstan Respýblikasynyń Konstitýtsiialyq zańynda QR Joǵarǵy Soty tóraǵasynyń azamattardy jeke qabyldaý mindeti kózdeledi (20-baptyń 1-tarmaǵynyń 10) tarmaqshasy). Ókinishtisi sol. Bul zańdardy oryndaýda memlekettik organdar salǵyrttyq tanytyp otyr.
Sonda, jalǵyz balasy jalamen sottalǵan ana, jarynyń jumbaq qazasy, jyldap tergelmegen áiel, áskerdegi uly múgedek bolyp qalǵan áke, kásibinen zańsyz aiyrylǵan kásipker, jalǵyz baspanasy alaiaqtarǵa qoldy bolǵan otbasy, sot sheshimin oryndata almai júrgen jábirlenýshiler t.s.s. myńdaǵan qorǵansyz halyq ádildikti qaidan tappaq? Bilseńizder aityńyzdarshy!
Qazaqta: «Baidy qudai urarda – bailyǵyna mas bolar,
Bidi qudai urarda – buqaraǵa qas bolar» - degen eskertý bar. Halyqtan qashpańyzdar.
Joǵaryda aitylǵandy eskere otyryp, Sizderden atalǵan laýazymdy tulǵalar men halyqtyń arasynda kedergisiz bailanys ornatý joldaryn qarastyrýlaryńyzdy jáne azamattardyń aryzdary syrǵytpa jaýap (otpiska) deńgeiinde qalmaýyn qadaǵalaý júiesimen qamtamasyz etýlerińizdi, tipti bolmasa, depýtattardyń esigi kórinbeitin kabinetterge eldiń ótinishin jetkizýge múmkindik berýlerińizdi Qazaqstan Respýblikasy Parlamenti Májilisi Reglamentiniń 11-taraý 149-tarmaǵyna sáikes talap etemin!" - dedi ol.
