دەپۋتات رينات زايىتوۆ باس پروكۋرور بەرىك اسىلوۆقا دەپۋتاتتىق ساۋال جولداپ، كەيبىر قۇزىرلى ورگاندار حالىقتىڭ مۇڭ-مۇقتاجىنا نازار اۋدارماي وتىرعانىن جەتكىزدى، - دەپ حابارلايدى Dalanews.kz.

رينات زايىتوۆ پرەزيدەنت جولداۋىندا ايتىلىپ جۇرگەن تاپسىرمالاردىڭ ءبىرى – «اشىقتىق پەن ادىلەتتىلىكتى» ىسكە اسىرۋدا ۇكىمەت مۇشەلەرى مەن وزگە مەملەكەتتىك ورگاندارى ماردىمسىز جۇمىس جاساپ وتىرعانىنا كۇن سايىن كوز جەتىپ وتىرعانىن مالىمدەدى.

"پارلامەنت ءماجىلىسى حالىقپەن تىكەلەي بايلانىستا بولعاندىقتان جۇما سايىن جۇرتتىڭ ارىزىن تىڭداپ، وتىنىشتەرىن قابىلدايدى. سولاردىڭ باسىم كوپشىلىگى بەلگىلى ءبىر ۆەدومستۆو باسشىسىنىڭ قابىلداۋىنا كىرۋ. سەبەبى، وڭىرلەردەگى جانە الىپ مەگاپوليستەردەگى شولاق بەلسەندى، ورتاشا دەڭگەيدەگى قىزمەتكەرلەردىڭ «ءوزىم بىلەمدىككە» سالىپ زاڭ بۇزۋى ازاياتىن ەمەس. وعان مىسالىمىز دا، دالەلىمىز دە جەتىپ ارتىلادى.

بۇعان توقتاۋ قوياتىن باس پروكۋراتۋرا، جوعارعى سوت پەن مينيسترلەردىڭ ەسىگى حالىق كەلگەندە ءبىر اشىلعان ەمەس. بۇل قالاي؟ «ەستۋشى ۇكىمەت» قاعيداتىن ۇستانۋدى تاپسىرعان مەملەكەت باسشىسىنىڭ ءسوزى ەسكەرىلۋگە دە تاتىماعانى ما؟" - دەدى دەپۋتات.

زايىتوۆتىڭ سوزىنشە، ق ر ارپك 90-بابىنىڭ 1-تارماعىنا سايكەس مەملەكەتتىك ورگانداردىڭ باسشىلارى جانە ولاردىڭ ورىنباسارلارى ءتيىستى مەملەكەتتىك ورگاننىڭ باسشىسى بەكىتەتىن قابىلداۋ كەستەسىنە سايكەس ايىنا كەمىندە ءبىر رەت ازاماتتاردى جانە زاڭدى تۇلعالاردىڭ وكىلدەرىن، ونىڭ ىشىندە وسى ورگانداردىڭ قىزمەتكەرلەرىن جەكە قابىلداۋدى جۇرگىزۋگە مىندەتتى.

«قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى» قازاقستان رەسپۋبليكاسىنىڭ كونستيتۋسيالىق زاڭىندا ق ر جوعارعى سوتى ءتوراعاسىنىڭ ازاماتتاردى جەكە قابىلداۋ مىندەتى كوزدەلەدى (20-باپتىڭ 1-تارماعىنىڭ 10) تارماقشاسى). وكىنىشتىسى سول. بۇل زاڭداردى ورىنداۋدا مەملەكەتتىك ورگاندار سالعىرتتىق تانىتىپ وتىر.

سوندا، جالعىز بالاسى جالامەن سوتتالعان انا، جارىنىڭ جۇمباق قازاسى، جىلداپ تەرگەلمەگەن ايەل، اسكەردەگى ۇلى مۇگەدەك بولىپ قالعان اكە، كاسىبىنەن زاڭسىز ايىرىلعان كاسىپكەر، جالعىز باسپاناسى الاياقتارعا قولدى بولعان وتباسى، سوت شەشىمىن ورىنداتا الماي جۇرگەن جابىرلەنۋشىلەر ت.س.س. مىڭداعان قورعانسىز حالىق ادىلدىكتى قايدان تاپپاق؟ بىلسەڭىزدەر ايتىڭىزدارشى! 

قازاقتا: «بايدى قۇداي ۇراردا – بايلىعىنا ماس بولار،
ءبيدى قۇداي ۇراردا – بۇقاراعا قاس بولار» - دەگەن ەسكەرتۋ بار. حالىقتان قاشپاڭىزدار.

جوعارىدا ايتىلعاندى ەسكەرە وتىرىپ، سىزدەردەن اتالعان لاۋازىمدى تۇلعالار مەن حالىقتىڭ اراسىندا كەدەرگىسىز بايلانىس ورناتۋ جولدارىن قاراستىرۋلارىڭىزدى جانە ازاماتتاردىڭ ارىزدارى سىرعىتپا جاۋاپ (وتپيسكا) دەڭگەيىندە قالماۋىن قاداعالاۋ جۇيەسىمەن قامتاماسىز ەتۋلەرىڭىزدى، ءتىپتى بولماسا، دەپۋتاتتاردىڭ ەسىگى كورىنبەيتىن كابينەتتەرگە ەلدىڭ ءوتىنىشىن جەتكىزۋگە مۇمكىندىك بەرۋلەرىڭىزدى قازاقستان رەسپۋبليكاسى پارلامەنتى ءماجىلىسى رەگلامەنتىنىڭ 11-تاراۋ 149-تارماعىنا سايكەس تالاپ ەتەمىن!" - دەدى ول.