"Ár shaqyrymyna 35 teńgeden tóleidi" degen áńgimeni estigen júrgizýshiler jappai narazylyqqa shyǵyp jatyr, dep habarlaidy Dalanews.kz KTK arnasyna siltep.
Almaty qalasynyń shyǵaberisindegi dámhananyń aldyna toptasqandar – ailyǵyn alys jolǵa shyǵýdan tabatyn júrgizýshiler. Politseiler júk kóligin munda qańtarýǵa ruqsat bermegen soń jaiaý-jalpylap jetti. Talap – tas joldaǵy tarifti kótermeý.
"Almatydan Oralǵa deiin 80 myń tóleý kerek eken. Qyzylorda men Jezqazǵan ortasynda múldem jol joq. Ózimizdegi Qaraǵandy, Almaty, Nur-Sultanda da jol joq. Ol joldardy qalai aqyly qylady? Halyqtyń bári soǵan narazy", - deidi júrgizýshi Ramil Kýliev.
Daýdyń basy "Qazavtojoldyń" uzyndyǵy alty myń shaqyrymǵa jýyq 18 jol bóligi 1 maýsymnan bastap aqyly bolady degen habarynan bastaldy. Aldyn ala internetpen tólem jasasa – 25 teńge, bekette aqysyn tólese, shaqyrymyna 35 teńge tóleýi kerek degen habar qulaqqa túrpidei tigen. Júrgizýshiler mundai aqyny alyp tastamasa, joldy jaýyp tastaýǵa daiyn.
"Halyqqa ózderi tiisip otyr ǵoi. Úkimet soliarka baǵasyn kóterip, neǵyp jatsyń dep shuqyp jatyr. Qarny toq bolsa, qarapaiym halyq shyryldamaidy, eshqaida shyqpaidy", - deidi júrgizýshi Qýat Baijumaev.
Aqtóbe oblysynda da 300-ge jýyq júrgizýshi talap-tilegin aitýǵa Samara-Shymkent trassasyna jinaldy. "Jolǵa shyǵyp qozǵalysqa kedergi jasady" degen jeleýmen 11 adamdy politsiia ýchaskesine alyp ketti. Solardyń arasynda aiyppul arqalaǵandardyń biri – Medet Qýatov zańǵa qaishy eshnárse istemedik, kerisinshe, bizdi qyspaqqa aldy deidi.
"Politsiia bólimshesiniń bastyqtary qysym jasap, bizdi OMON-men kelip alyp ketti. Endi shyǵatyn bolsańdar, qamaimyz dep aitty. Bizge aiyppul saldy", - deidi júrgizýshi Medet Qýatov.
Al keshe ǵana "Atyraý-Aqtaý" tas jolynyń boiynda júk kóliginiń júrgizýshileri shý shyǵarsa, búgin qala ishinde bas kóterdi. Báriniń bazynasy bir – jolǵa tólenetin aqyny shaqyrymyna 5 teńgeden joǵary kótermeý. Jinalǵan top batys aimaqta turatyn aýyr júk tasityn kólik júrgizýshilerin oblys aýmaǵynda tegin júrgizýdi talap etip otyr.
"Qazir jol tegin. Qasynan aqyly jol salsyn. Jol keremet bolsa, bári sonymen júredi. Qaýipti jolmen júrgenshe, jaqsy jolmen júrgen jaqsy emes pe, durys pa? Óz basym sapaly jol salyp berse, sonymen júremin", - deidi Erbolat Baiǵabylov.
Mańǵystaý oblysynda da júrgizýshiler osymen aitqanynan qaitpai, narazylyq sharasyn jalǵastyryp jatyr. Bul aimaqta Atyraýdan Aqtaýǵa deiin, Beineý aýdanynan Ózbekstan shekarasyna deiingi jol aqyly bolmaq. Kúrejol arqyly oblysqa azyq-túliktiń 80% syrttan tasymaldanady. Eger joldy aqyly qylsa, onda tamaq ta qymbattaýy múmkin, deidi jinalǵandar.
"Qazirgi qiyn zamanda joldy aqyly qylý durys emes. Halyqpen kelisý kerek edi. Halyqtyń jaǵdaiy máz emes. Ózderiń bilesińder, kredit tóleý kerek. Halyqty qysa bergendi doǵarý kerek, halyqta eshteńe qalǵan joq", - dep ashyndy júrgizýshilerdiń biri.
Respýblika boiynsha narazylyqqa shyqqan júrgizýshilerdi "Qazavtojol" sabyrǵa shaqyrady. Maýsymnan bastap 18 ýchaske aqyly bolady degen habardy rastaǵanmen, bárine birdei aidyń basynan tólem alynbaidy. Jóndeý kóbinde aiaqtalmaǵan. Al júrgizýshiler aitqandai shaqyrymyna 35 teńge tóleidi degen jańa tarif bekitilmedi deidi.
"2013 jyldan bastap tarif ózgergen joq. Jeńil kólik úshin ár shaqyrymyna bir teńge. Júk kólikterine 5-25 aralyǵynda. Ol tiep alǵan júgine bailanysty. Bizde júk kólikteri alty sanatqa bólinedi", - dep túsindirdi "Qazavtojol" UQ" AQ resmi ókili Dias Ahmetshárip.
"Qazavtojoldyń" bul jaýaby júrgizýshilerge jubatý bolmai tur. Aqyly etkiziletin 18 jol bóliginiń báriniń oi-shuńqyry bitelip, taqtaidai sairap jatpaǵanyn basqasy basqa, olar kúnde kózimen kórip, azabyn tartyp júr. Narazylyq tolqýǵa ulaspas úshin "Qazavtojol" kompaniiasy jumys toby qurylǵanyn, barlyq shaǵymdy tyńdaýǵa daiyn ekendigin jetkizip, ázirge áńgimeni jyly japty.
https://www.youtube.com/watch?v=k7N892C4oQo
