Qazaqstannyń Halyqaralyq Araldy qutqarý Qoryna tóraǵalyq etý kezeńine arnalǵan Atqarý komitetiniń jumys jospary bekitildi, dep habarlaidy Dalanews.kz.
Astanada Tájikstan, Túrikmenstan, Ózbekstan jáne baqylaýshy el retinde qatysyp otyrǵan Qyrǵyzstan delegatsiialarynyń qatysýymen Halyqaralyq Araldy qutqarý Qory Basqarmasynyń otyrysy ótip jatyr. Otyrys barysynda Qazaqstannyń 2024-2026 jyldary tóraǵalyǵy kezinde Halyqaralyq Araldy qutqarý Qory Atqarý komitetiniń jumys jospary bekitildi.
Jospar quryltaishy memleketterdiń basshylary men HAQQ Prezidentiniń tapsyrmalaryn iske asyrýdy, Qordyń uiymdyq qurylymy men sharttyq-quqyqtyq bazasyn jetildirýdi, halyqaralyq yntymaqtastyqty nyǵaitý men keńeitýdi, HAQQ atqarý komitetiniń qurylymdyq bólimsheleriniń jumysyn úilestirýdi, tabiǵi resýrstardy qorǵaý jónindegi aqparattyq, taldamalyq jáne úgit jumystaryn, óńirlik jáne halyqaralyq is-sharalardy uiymdastyrýdy, ótkizýdi jáne olarǵa qatysýdy qamtidy.
Sondai-aq, josparda eki aýqymdy jobany odan ári iske asyrý kózdelgen. Bul Aral teńizi basseini elderine kómek kórsetý jónindegi is-qimyl baǵdarlamasy, onyń sheńberinde óńirde 35 joba iske asyrylýda jáne Ortalyq Aziiada ornyqty damý úshin qorshaǵan ortany qorǵaý jónindegi óńirlik baǵdarlama. Budan bólek, Qor Qazaqstan, Qyrǵyzstan, Tájikstan, Túrikmenstan jáne Ózbekstan kiretin Memleketaralyq sý sharýashylyǵyn úilestirý komissiiasyna jáne HAQQ ornyqty damý jónindegi memleketaralyq komissiiaǵa belsendi túrde járdemdesýge nietti.
"Ózderińiz biletindei, búgingi tańda Prezidentimiz Halyqaralyq Araldy qutqarý Qorynyń basshysy bolyp sailandy. Qordyń tóraǵasy retinde bizdiń elimizge úlken jaýapkershilik júktelgen jáne Biz Ortalyq Aziianyń basqa memleketterimen tyǵyz qarym-qatynasta bolamyz. Biz birlesip Aral teńizin saqtaý boiynsha eleýli nátijelerge qol jetkizdik jáne osy baǵyttaǵy jumysty ári qarai jalǵastyrýǵa niettimiz", – dedi Sý resýrstary jáne irrigatsiia ministri Nurjan Nurjigitov.
