Volonterlik qyzmet ár elde ózinshe qalyptasqany anyq. Bul – qyzmetti qandaida bir elge tańyp, enshilep berýge bolmas. Aitalyq, qazaq qoǵamyndaǵy asarlatyp is bitirýdi osy volonterlik qyzmetke jatqyzýǵa bolar edi. Dál osyndai jaqsy dástúr ózge elderde de kezdesedi. Sol sebepti volenterlik qyzmetti bir elge tán dúnie dep kesip aitýǵa kelemeidi. Qaita volonterlik áreketti jalpy adamzatqa tán qubylys dep aitqan oryndy siiaqty.
Eger kóne tarihqa kóz salsaq, HIV ǵasyrda Eýropada túrli juqpaly aýrýlar taraǵan indettiń taralyp ketpeýi úshin mert bolǵan adamdardy jinaýǵa janyn qurban etken adamdardy eriktiler dep ataǵanyn bilemiz.
Mundai jankeshti áreket bizdiń dáýirimizde de oryn aldy. Aitalyq, Japoniiada Atom elektr stansalarynda apat bolǵan sátte halyq arasynan sýyrylyp shyqqan jankeshtiler apattyń saldaryn joiyp, jas urpaqtyń amandyǵy úshin bastaryn báigege tikti emes pe? Bul – naǵyz volenterlik árekettiń jarqyn úlgisi desek bolady.
Ótken ǵasyrdyń basynda Stalindik qýǵyn-súrgin kezinde kóptegen ult ókilderi Qazaqstanǵa kúshtep kóshirilgende, jol azabyn tartyp, ólimshi kúide jetken myńdaǵan ózge ult ókilderin qazaqtar baýyrlaryna basyp, qolynda barymen bólisýi de volonterlik istiń aiqyn bir kórinisi dep tarih betterine jazyp qoiýýǵa bolady.
Sol bir zulmat jyldary qazaq halqynyń qamqorlyǵyn sezingen kóptegen ulttar áli kúnge deiin Qazaq halqyna alǵys aitady. Júk kólikterin júrgizetin qazaqtyń jigitteri Eýropaǵa bara jatyp, nemese, kele jatyp sheshenderdiń jerinen ótkende kóligi synyp, qandaida bir oqiǵaǵa tap bolsa, sol mańdaǵy sheshender qazaqtarǵa qol ushyn berip, kóligin jóndep, as-sýyn berip, qonaq qylyp jiberetinen jii estimiz.
Sol kezde sheshenniń jastary sol bir qiyn kezeńde óziniń ata-babalaryna qazaqtardyń qalai qamqorlyq kórsetkenin aitqanda árqaisymyzdyń kókeiimizdi maqtanysh sezimi kerneitini anyq. Bul endi volonterlik qyzmettiń qudireti ǵoi. Ol kezde ámirshil-ákimshil júie qýǵyn-súrginge salǵan ulttardy joq qylýdy kózdegeni anyq. Al qazaq halqy birneshe ulttyń joq bolyp ketýden saqtap qaldy.
Osy jaittardy eske alyp, oi qorytsaq, qazaq jerinde volonterlik qyzmet baiaǵydan qanat jaiyp, sińisti bolǵanyn baiqaimyz.
Kúni keshe ǵana Reseiden ondaǵan myń orys aýa kóshkende el azamattary basyna is túsken myńdaǵan orysqa kómek qolyn sozdy. Jastardyń bul áreketin bireýler synasa, endi bireýlerdiń quptady. Qalai desek te, osy joly elimizge kelgen orys aǵaiyndar bizdi jańa qyrynan tanyǵany anyq.
Erteń olar óz eline qaityp barǵanda qazaqtar jaiynda qisyq pikir aitqan otandastarynyń eskertý jasap, qazaqtyń ozyq ultqa ainalǵanyn aitatyn bolady.
Bizder kisige kómektesýden jamanshylyq kórmeimiz. Ótken jyly elimizde qýańshylyq bolyp, batys óńirde jem-shóp jetispegen sátte Qurmet bastaǵan azamattar Batysqa vagon-vagon jem-shóp jóneltip, tórt-túlikti juttan aman saqtap qalǵany bárimizdiń esimizde.
Osy bir qarapaiym jaittan-aq, elimiz úshin volonterlik qyzmettiń qazaq úshin mańyzy zor ekenin baǵamdaýǵa bolady. Sondyqtan bizder volonterlik qyzmetti damytyp, bul iske bel býyp, bilek sybana kirisken isin nasihattap, dáripteýmiz kerek. Osyndai izgilik sharýalar bizdi tutastyryp, memleketimizdi nyqtai túsetini anyq.
Nurlan JUMAHAN.
