Chýkotkadaǵy (Reseı) iri altyn jáne mys ken ornyn ıgerýdi josparlap otyrǵan «Baımskaıa» taý-ken kompanıasyna AQSH sanksıa saldy. Bul SDN List-ke engenderdiń Amerıkadaǵy shottardy buǵattalyp, olarǵa amerıkalyq rezıdenttermen seriktestik jasaýǵa tyıym salynady dep habarlaıdy Dalanews.kz Dala Finance telegram–arnasyna siltep.
Qazir «Baımskaıa» kompanıasy «Astana» Halyqaralyq qarjy ortalyǵynda 2022 jyldyń maýsymynda tirkelgen Trianon Limited jeke kompanıasyna tıesili. Ieleri — Vladımır Kım (álemdik Forbes reıtıńinde 890-orynda, jergilikti tizimde 1-orynda turǵan bıznesmen) men Oleg Novachýk (jergilikti reıtıńde 13-orynda).
Bes jyl buryn kompanıany qazaqstandyq KAZ Minerals Roman Abramovıch pen Aleksandr Abramovtyń Aristus Holdings kompanıasynan satyp alǵan edi. Qolma-qol aqsha men aksıalar túrinde jasalǵan mámile somasy — 900 mln dollar. Jospar boıynsha jobany damytýǵa 8 mlrd dollar quıylýy kerek bolǵan.
Osy jobany iske asyrý úshin KAZ Minerals VTB-dan 3,6 mlrd dollar kredıt alǵan. Biraq bankke sanksıa salynǵan soń, qaryzyn qaıtarýda másele týyndaǵan edi. Byltyr shildede «Baımskaıa» kompanıasy Trianon Limited ıeligine ótken. Bul kompanıanyń negizgi aksıonerleri — joǵaryda aty atalǵan qos kásipker. Ekeýara mámile jasalǵannan keıin KAZ Minerals Reseıdegi jumysyn toqtatady delingen.
